काठमाडौँ । प्रधानमन्त्री निवास बालुवाटारमा सत्ता गठबन्धन दलको शीर्ष नेताको बैठक सुरु भएको छ ।

बैठकमा प्रधानमन्त्रीसमेत रहेका नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधव कुमार नेपाललगायत नेताहरू सहभागी भएका छन् ।

आज बसेको बैठकमा नेकपा एसबाट सरकारमा सहभागी मन्त्रीहरू परिवर्तन गर्नेबारे छलफल हुने स्रोतले जनाएको छ ।

मन्त्री फेर्ने निर्णय गर्दा आफूहरूलाई अपराधी जस्तै व्यबहार गरेर निर्णय लिएको भन्दै असन्तुष्ट मन्त्रीहरू विरोध खतिवडा, रामकुमारी झाक्रीलगायत ४ मन्त्रीसहित १० सांसदले पार्टीभित्र छलफल गर्न तत्काल संसदीय दल बैठक बोलाउन पार्टी अध्यक्ष नेपाललाई दबाब दिइरहेका छन् । शनिबार राति मात्रै मन्त्रीहरू खतिवडा र झाक्रीले प्रधानमन्त्री देउवासँग भेट गरेका थिए ।

पार्टीभित्र मन्त्री फेरबदलको विषयमा माधव नेपाललाई ठूलो दबाब रहेको छ । यसैबीच आज बिहान बालुवाटारमा गठबन्धनका शीर्ष नेताबीच बैठक बसेको हो ।