काठमाडौँ । जनता समाजवादी पार्टी (जसपा)का संघीय परिषद् अध्यक्ष डा. बाबुराम भट्टराईको आग्रहलाई प्रधानमन्त्री शेरबहादुर देउवाले अस्वीकार गरेका छन् । उनले देउवालाई आफ्नो पार्टीबाट मन्त्री हेरफेर नगर्न आग्रह गरेका थिए ।

जसपाका अध्यक्ष उपेन्द्र यादवले आफू पक्षीय तीन मन्त्रीलाई फिर्ता बोलाएर नयाँ नामावाली पठाएसँगै भट्टराईले त्यसलाई रोक्न प्रधानमन्त्रीसँग आग्रह गरेका थिए ।

यादवले एकल निर्णयमा कृषिमन्त्री महिन्द्र राय यादव, भौतिक पूर्वाधार मन्त्री रेणुकुमारी यादव र वन मन्त्री राम सहायप्रसाद यादवलाई फिर्ता बोलाएका थिए । यस्तै, कृषिमा मृगेन्द्रप्रसाद सिंह, भौतिक पूर्वाधारमा मोहम्मद इस्तियाक राई र वन मन्त्रालयमा प्रदीप यादवको नाम पठाएका थिए ।

जसपाबाट सरकारमा गएका तीन मन्त्रीले पद तथा गोपनीयताको शपथ लिनुका साथै पदभार ग्रहण गरिसकेका छन् ।