काठमाडौँ । स्वास्थ्यमा क्रियाशील ट्रेड युनियन र पेशागत संघ संगठनको माग सम्बोधन गर्न ७ सदस्यीय कार्यदल बन्ने भएको छ । स्वास्थ्य तथा जनसंख्या राज्यमन्त्री हिराचन्द्र केसीले माग सम्बोधनका लागि स्वास्थ्य मन्त्रालयका अधिकारीको संयोजकत्वमा कार्यदल गठन गरिने बताएका हुन् ।

‘स्वास्थ्यमा क्रियाशील ट्रेड युनियन र पेशागत संघ संगठनहरूको माग सम्बोधन गर्न कार्यदल गठन हुन्छ, कार्यदलले समस्या मात्रै होइन मन्त्रालयलाई सुझाव पनि दिनेछ, कार्यदलबाट तत्काल के गर्न सकिन्छ ? दीर्घकालीन के गर्न सकिन्छ ? ठोस योजना बन्नेछ,’ उनले भने, ‘त्यहीअनुसार अघि बढ्न सकिन्छ ।’

कार्यक्रममा स्वास्थ्य मन्त्रालयका सचिव डा. रोशन पोखरेलले स्वास्थ्यका समस्या हल गर्न आफू निरन्तर स्वास्थ्यमा क्रियाशील ट्रेड युनियन र पेशागत संघ संगठनसँगै रहेर काम गर्दै आएको बताए । उनले आफ्ना हकहित जनतासँग जोडिने गरी काम गर्नु पर्ने बताए ।

स्वास्थ्यमा क्रियाशील ट्रेड युनियन र पेशागत संघ संगठनको संयोजकसमेत रहेका नेपाल चिकित्सक संघका अध्यक्ष डा. लोचन कार्कीले स्वास्थ्यकर्मीको माग सम्बोधनमा सरकार गम्भीर हुनु पर्ने र अन्तर मन्त्रालय समन्वय अहिलेको खाँचो रहेको बताए ।

पेशागत संघ संगठनका सदस्य सचिव माइकल देवकोटाले विगतमा भएको १९ बुँदे सम्झौता अक्षराशं पालना हुनु पर्ने बताए । उनले भने, ‘स्वास्थ्यमा क्रियाशील ट्रेड युनियन र पेशागत संघ संगठन र मन्त्रालयका अधिकारीबीच स्वास्थ्यकर्मीलाई जोखिम भत्ता, स्वास्थ्यलाई संघमा राख्ने, समायोजनलगायत विविध विषयमा सम्झौता भयो, ती सम्झौता कार्यान्वयन हुनु पर्ने देखिन्छ ।’

कार्यक्रमको सहजीकरण स्वास्थ्य मन्त्रालयका प्रमुख विशेषज्ञ डा. संगीता कौशल मिश्राले गरेकी थिइन् ।