काठमाडौँ । सहरी विकासमन्त्री मेटमणि चौंधरीले मन्त्री पदबाट हट्दा हाँसेरै जाने टिप्पणी गरेका छन् । मंगलबार संघीय संसद प्रतिनिधिसभाको विकास तथा प्रविधि समितिको बैठकमा बोल्दै उनले मन्त्री भएर आउँदा हाँसेर आएकाले हाँसेरै जाने बताएका हुन् ।

बैठकमा सांसदले निवर्तमान सहरी विकासमन्त्री रामकुमारी झाँक्रीले मन्त्रालयबाट बिदाई हुँदा रोएकोतर्फ संकेत गर्दै मन्त्री चौंधरीलाई हाँसेरै जान शुभकामना दिएका थिए । त्यसको जवाफमा उनले जाने बेलामा आफू अझ बढी हाँसेर जाने बताए ।

उनले मन्त्रीको पदमा रहुञ्जेल सांसदहरुले दिएको सुझावलाई ग्रहण गरेर अघि बढ्ने प्रतिबद्धता व्यक्त गरे । ‘माननीय जीहरुले शुभकामना दिने बेलामा धेरै महत्वपूर्ण सुझावहरु दिनु भएको छ, आउँदा खुसी भएर आउने, जाने बेला रुने कुरा पनि भन्नु भएको छ,’ उनले भने, ‘मलाई क्लियर के छ भने मन्त्री हुुने कुरा रेगुलर प्रोसेसको कुरा हो, म सधैभरि रहिरहदिन, जाँदा हाँसेर जान्छु ।’

त्यस अवसरमा उनले सरकारले एक हप्ताभित्र ‘सहरी विकाससम्बन्धि नीति’ सार्वजनिक गर्ने प्रतिबद्धता जनाएका थिए ।