काठमाडौँ । पूर्व अर्थमन्त्री जनार्दन शर्माले बजेट निर्माणमा अनैतिक व्यक्ति प्रवेश गराएको भन्दै सुरु भएको छानबिनमा रिकभर गरी पठाएको सीसीटीभी फुटेज प्रष्ट नदेखिने भएको छ ।

नेपाल प्रहरीको विधि विज्ञान प्रयोगशालाले पठाएको सीसीटीभी फुटेज स्पष्ट नदेखिने र एक दुई सेकेण्डका क्लिपका भएपछि छनबिन समितिका सदस्यहरुले विज्ञलाई बोलाएका थिए । फरेन्सिक विज्ञको रुपमा दुई जना प्रहरी अधिकृत संसदीय छानविन विषेश समितिको बैठकमा बसेका थिए।

यस क्रममा फरेन्सिक विज्ञलाई सांसदले सोधे, ‘भिडियो क्वालिटी किन यस्तो ? सरर देखिने हुन्न ?’

जवाफमा विज्ञद्वयले रिकभर हुनु नै ठूलो कुरा भएको बताएका थिए । उनीहरूले क्वालिटीको रिकभर गर्न नसकिएको स्वीकार गरे ।

अब छानबिन गर्न गठित संसदीय विशेष समितिले सहमतिमै प्रतिवेदन लेख्ने भएको छ । म्याद थपका लागि आग्रह नगर्ने र सहमतिमै प्रतिवेदन लेख्ने निर्णयमा समिति पुगेको हो ।