काठमाडौँ । आफू बलात्कृत भएको भन्दै आन्दोलन गर्दै आएकी अविवाहित आमा २० वर्षीय निहारिका राजपुतले आत्मदाहको प्रयास गरेकी छन् । उनले प्रशासनले कानूनी लडाइँमा सहयोग नगरेको भन्दै राष्ट्रपति भवन शितल निवासअघि आत्मदाहको प्रयास गरेकी हुन् ।

उनले आफ्नै शरीरमा पेट्रोल खन्याएपछि प्रहरीले आत्मदाह गर्न नदिइ पक्राउ गरेको थियो । राजपुत आफ्नो बच्चाको डीएनए जाँच गरिनु पर्ने माग राख्दै अनसनसमेत बसेकी थिइन् ।

गत आइतबार बिहान सर्वोच्च अदालत परिसरमा अनसन बस्दा उनलाई प्रहरीले पक्राउ गरेको थियो । आफूमाथि जनकपुरका शिवराज श्रेष्ठले बलात्कार गरेर त्यसको तस्वीर र भिडियो बनाएर ब्ल्याकमेल गरेको उनको भनाइ छ । तर जिल्ला अदालत श्रेष्ठलाई सफाइ दिइसकेको छ । उनको एक छोरा छन् ।