काठमाडौँ । गृहमन्त्री बालकृष्ण खाँणले विपद्का लागि छुट्टयाएको रकमको पूर्ण सदुपयोग हुनु पर्ने बताएका छन् । विपद् जोखिम न्यूनिकरण तथा व्यवस्थापन कार्यकारी समितिको बैठकमा उनले विपद्को रकम सदुपयोगमा सचेत र संवेदनशील रहन सम्बन्धित सरकारी निकाय र राष्ट्रिय विपद् जोखिम न्यूनिकरण तथा व्यवस्थापन प्राधिकरणलाई निर्देशन दिएका हुन् ।

गृहमन्त्री खाँणले विपद्मा प्रभावितलाई राहत वितरण र विपदबाट क्षतिग्रत संरचना निर्माणमा रकम खर्च गर्दा पनि रार्वजिनक ऐन आकर्षित हुने भन्दै प्रचलित ऐन र कानुनअनुसार नै बजेट खर्च गर्न निर्देशन दिए । उनले कार्यकारी समितिका निर्णय गम्भीर भएर कार्यान्वयन गर्न पनि सम्बन्धित निकायलाई निर्देशन दिए ।

विपदबाट नागरिक र संरचना बचाउन एकतर्फ बजेट नहुने र बजेटको व्यवस्थापन भए पनि खर्च गर्न नसक्ने अवस्था नआओस् भन्नेमा सरकार सचेत रहेको गृहमन्त्री खाणले बताए । सरकार विपदबाट प्रभवितको उद्धार, राहत र व्यवस्थापनका लागि रकमको अभाव हुन नदिन पर्यत्नशील रहेको पनि बताए ।

विपद्को सामना गर्न स्थानीय तहमा प्राविधिक जनशक्ति प्रयाप्त नभएकाले केन्द्रका मन्त्रालय र विभागबाट पुग्नु पर्ने अवस्था रहेको भन्दै उनले संघ, प्रदेश र स्थानीय दलहको समन्वयमा प्रभवित नागरिकको राहत, उद्धार र व्यवस्थापन तथा प्रभवित संरचनाको पुर्न निर्माण होस् भन्ने पक्षमा सरकार रहेको बताए ।

उनले विपद् व्यवस्थापनमा सुरक्षा निकायहरू, नेपाली सेना, नेपाल प्रहरी र सशस्त्र प्रहरीले निभाएको भूमिकाको प्रशंसा गर्दै सुरक्षा निकायको प्रयासले विपदबाट ठूलो जनधनको क्षति हुन जोगिएको बताएका थिए ।

बैठकले पाँचथर, उदयपुर, गोरखा, डडेलधुरा, बझाङलगायतका जिल्लाहरूमा मनसुनजन्य विपदबाट क्षतिग्रस्त अत्यावश्यक संरचनाको पुननिर्माणका लागि विपद् व्यवस्थापन कोषको बजेट उपलब्ध गराउने निर्णय गरेको छ । त्यस्तै, बैठकमा खोटाङ र लमजुङमा भूकम्पबाट क्षतिग्रस्त भएको निजी आवासहरू पुनः निर्माणबारे पनि छलफल भएको थियो ।