काठमाडौं। यो वर्ष तिहारमा २३ लाख २५ हजार स्वदेशी माला खपत हुने पुष्प व्यवसायीहरुले बताएका छन् ।

फ्लोरिकल्चर एसोसिएसनले तिहारका लागि २० लाख सयपत्री, ३ लाख मखमली र गोदावरीको २५ हजार थानसम्मको मालाहरु खपत हुने गरेको जानकारी दिएको छ ।

एसोसिएसनका अध्यक्ष मिनबहादुर तामाङले कोभिडमा घटेको फूलको मागमा वृद्धि भएको बताए । मागअनुसार अपुग हुने करिब ३ लाख थान माला भारतबाट आयात हुने उनले बताए । उनलेभने, ‘नेपाल ९० देखि ९१ प्रतिशतसम्म तिहारको फूलमा आत्मनिर्भर छ ।’
आव ०७८/ ०७९ मा नेपालले ३६ करोड ५ लाख रुपैयाँ बराबरको पुष्प तथा पुष्पजन्य वस्तुको आयात गरेको थियो । यो वर्ष १० देखि २० प्रतिशत फूलको उत्पादन बढेको पनि एसोसिएसनले जनाएको छ ।