काठमाडौं । कतार विश्वकप शुरु हुनु अगाडी अर्जेन्टिनी कप्तान लियोनल मेस्सी घाइते भएका छन् । उनको गोलीगाँठामा चोट लागेको छ । विश्वकप फुटबल सुरु हुन दुई साता मात्रै बाँकी हुँदा मस्सी घाइते भएका हुन

पेरिस सेन्ट जर्मनका खेलमा मेस्सी घाइते भएका कारण लिग १ का खेलमा देखिने छैनन । शनिबार राति हुने लिग १ को खेलमा लोरियन्टविरुद्ध मेस्सी उपलब्ध नहुने भएका हुन्। तर उनी विश्वकपका लागि भने फिट हुने अपेक्षा गरिएको छ।

प्रशिक्षणका क्रममा मेस्सीको गोलिगाँठामा चोट लागेको छ। चोट सामान्य नै रहेको र विश्वकपअघि नै ठिक भइसक्ने मेडिकल टिमले जानकारी गराएको छ। पीएसजीले विश्वकप अघि अर्को खेल अक्जेरसँग खेल्दैछ। विश्वकपअघि दुवै खेल गुमाउने सम्भावना छ।

३५ वर्षीय मेस्सी नेतृत्वको टिमलाई कतार विश्वकपको बलियो दाबेदार मानिएको छ। कतार विश्वकपमा अर्जेन्टिना समूहमा सी मा छ। यो समूहमा साउदी अरेबिया, मेक्सिको र पोल्याण्ड छन्। विश्वकप मंसिर ४ गते सुरु हुँदै छ।
मंसिर ६ गते अर्जेन्टिनाले पहिलो खेल साउदी अरेबियासँग खेल्दै छ।