दोलखा । कालिञ्चोक केबलकारको भाडा बढाइएको छ । चुनावको मुखमा भाडा बढाइएपछि चुनाव खर्च उठाउन भाडा बढाइएको टिप्पणी हुन थालेको छ ।

कालिञ्चोक दर्शन लिमिटेडले पर्यटकीय सिजन सुरु भएसँगै २० प्रतिशत भाडा बढाउँदा कालिञ्चोक आउने पर्यटकहरू मर्कामा पर्ने देखिएको छ । जसका कारण पर्यटकहरूमा नकारात्मक प्रभाव पर्ने देखिएको छ । कालिञ्चोक दर्शन लिमिटेडले २० प्रतिशत भाडा बढाएर प्रतिव्यक्ति ६ सय पुर्‍याएको छ ।

प्रतिनिधिसभाका लागि दोलखाबाट नेकपा एमालेले बालकृष्ण शिवाकोटीलाई उम्मेदवार बनाएको छ । शिवाकोटी कालिञ्चोक दर्शन लिमिटेडका अध्यक्षसमेत हुन् । सोही कारण उम्मेदवारी दर्ता गराएपछि चुनाव खर्च उठाउन शिवाकोटीले केबलकारको भाडा बढाएको टिप्पणी हुने गरेको छ ।

४ वर्षअघि सञ्चालनमा आएको केबलकारमा ४ वटा गोण्डला छन् । हरेक डब्बामा १० जना बस्न सकिने क्षमता छ । केबलकारको भाडा यसअघि ५ सय रहेकोमा दसैँ अघिदेखि १०० रुपैयाँ बढेको हो ।

कुरीबाट कालिञ्चोकसम्म पुग्नका लागि केबलकारको लम्बाइ ९ सय मिटर छ । यसमा एकतर्फी यात्रा गर्न ४ मिनेट लाग्छ । कालिञ्चोक केबलकार मनकामना र चन्द्रागिरि हिल्सपछिको तेस्रो केबलकार हो । मनकामनामा ३ किलोमिटर लामो केबलकारको ७ सय र चन्द्रागिरि ४ किलोमिटरको भाडा ८ सय रुपैयाँ मात्रा जबकी ९ सय मिटर लामो कालिञ्चोक केबलकारको भाडा भने ६ सय पुर्‍याइएको छ ।

कालिञ्चोकको कुरीबाट मन्दिरसम्म पुग्न एक किलोमिटर उकालो हिँड्नुपर्छ । कतिपय धार्मिक पर्यटकहरू त्यही उकालो चढ्न नसकेकै कारण बीच बाटोबाटै फर्किन बाध्य हुने गरेका छन् । केबलकार निर्माणपछि कालिञ्चोक धार्मिक पर्यटकहरू बढेका छन् । तर, भाडा वृद्धिले कालिञ्चोकमा यात्रुहरूमा असर गरेको कालिञ्चोक मन्दिर तथा पूजा व्यवस्थापन समितिका अध्यक्ष सुकमान तामाङले बताए ।

२६ करोड रुपैयाँको लागतमा निर्माण गरिसक्ने लक्ष्य लिए पनि केबलकारको लागत ४० करोड रुपैयाँ पुगेको थियो । सञ्चालन खर्च धान्न नसक्ने भएकाले भाडा बढाउनु परेको कालिञ्चोक दर्शन लिमिटेडका प्रमुख कार्यकारी अधिकृत अशोक शिवाकोटीले बताए । भाडा बढेपछि कतिपय यात्रु भने हिँडेरै मन्दिर जान थालेका छन् ।

केबलकार बनेको क्षेत्र कालिञ्चोक गाउँपालिका वडा नं. १ र ५ बीच सीमाको स्वामित्व विवाद छ । त्यसैगरी केबलकारले भोगचलन गरेको जग्गा समेत गुठी र वन कसको भन्ने समेत विवाद छ । केबलकार सञ्चालन शिवाकोटीले पहुँचका भरमा गुठी बनाएर कम्पनीले भने गुठीसँग सम्झौता गरेको छ ।

जग्गासम्बन्धी विवाद अख्तियारले छानबिन गरिरहेको छ । जग्गा विवादकै कारण केबलकार निर्माणका बेला पटक पटक स्थानीयसँग झडप भएको थियो ।