काठमाडौँ । साताको पहिलो कारोबार दिन आज नेप्से परिसूचक उच्च अंकले बढेको छ । आइतबार नेप्से परिसूचक ३२.४३ अंक बढेर १९६५.९८ बिन्दुमा पुगेको हो ।

आइतबार कारोबारमा आएका २३३ कम्पनीको ४२ लाख २३ हजार कित्ता शेयर दुई अर्ब दुई करोड ५४ लाख ८९ हजार रुपैयाँ बराबरको खरिद बिक्री भएको छ । आज नेप्सेसँगै कारोबार रकम पनि बढेको छ ।

अघिल्लो कारोबार दिन एक अर्बभन्दा कमको शेयर कारोबार भएकोमा आज दुई अर्बमाथि पुगेको हो । नेप्सेका १३ उपसमूहमध्ये म्युचुअल फण्ड उपसमूहबाहेक अरु सबै उपसमूहको परिसूचक बढेको छ ।

जसमध्ये लघुवित्त उपसमूहको परिसूचक ३.०७ प्रतिशत बढेको छ । वित्त र उत्पादन तथा प्रशोधन उपसमूहको परिसूचक २ प्रतिशतभन्दा बढी बढेको छ भने बाँकी उपसमूहको १ प्रतिशतले बढेको छ ।

नेप्सेसँगै डिप्रोक्स लघुवित्तको शेयर मूल्य ८.२१ प्रतिशत बढेको छ । त्यस्तै, जीवन विकास लघुवित्तको शेयर मूल्य करिब साढे ७ प्रतिशत बढेको छ ।