काठमाडौँ । विदेशबाट शंकास्पद तबरबाट रकम भित्र्याएको आरोप लागेका पृथ्वीबहादुर शाह पक्राउ परेका छन् ।

केन्द्रीय अनुसन्धान ब्यूरो (सीआईबी)को टोलीले शाहसहित छ जनालाई पक्राउ गरेको हो ।

पक्राउ पर्नेहरूमा शाहसहित विजयविक्रम शाह, चक्रबहादुर खत्री, अनुप खड्का, रुक्मांगत काफ्ले र अछामका रंगबहादुर साउद रहेका छन् ।

प्रहरीका अनुसार उनीविरुद्ध अनुसन्धानका लागि शुक्रबार दिउँसो जिल्ला अदालत, काठमाडौँबाट म्याद लिइएको छ ।

शाहले व्यापार, रेमिट्यान्स र लगानीसँग सम्बन्धित आधा दर्जन कम्पनी स्थापना गरी अमेरिकाबाट नेपालमा रकम भित्र्याउँदै आएका थिए ।

अनुसन्धानका क्रममा पक्राउ गरी हिरासतमा राख्नु पर्ने देखिएपछि शुक्रबार अपराह्न शाहसहित सबैलाई पक्राउ गरिएको सीआईबीले जनाएको हो । तत्कालीन अर्थमन्त्री जनार्दन शर्माले राष्ट्र बैंकमा तोक लगाएर शाहको रोक्का भएको रकम फिर्ता गर्न दबाब दिएका थिए ।

तत्कालीन अर्थमन्त्रीको दबाबसँगै शाहले पत्रकार सम्मेलन गरेर आफूले जायज रुपमा रकम ल्याउन खोजेको बताउँदै आएका थिए ।