काठमाडौँ । प्रधानमन्त्री पुष्पकमल दाहाल ‘प्रचण्ड’ले आइसीसी विश्वकप लिगका विजेता टोलीका सदस्यालाई प्रतिव्यक्ति दुई लाख रूपैयाँ पुरस्कार दिने घोषणा गरेका छन् ।

‘सर्वप्रथम इतिहास रच्नुभएकोमा तपाईहरूलाई बधाइ छ, तपाईहरूले नयाँ रेकर्ड बनाउनुभएको छ, इतिहास रच्नुभएको छ,’ खेलाडीहरूलाई बधाइ दिँदै प्रधानमन्त्री दाहालले भने, ‘चार खेलमा पूरै विजय हासिल गरेर क्लिन स्वीप गर्नु भएको छ, यो देशकै गौरव हो ।’

उनले आगामी दिनमा पनि सफलता मिलोस् भन्दै नेपाल सरकारको तर्फबाट प्रतिखेलाडी दुई लाख रुपैयाँ पुरस्कार दिने बताएका हुन् ।

उक्त अवसरमा खेलाडीहरूले लिग चलिरहेकै बेला प्रधानमन्त्रीले आफूलाई हौसला दिएकोमा धन्यवाद दिँदै नेपाली खेलाडीहरूले वास्तविक अभिभावक पाएको भन्दै खुसी व्यक्त गरे ।