काठमाडौँ । जनकपुरधाममा अवैधरूपमा सञ्चालनमा रहेको कल सेन्टरबाट प्रहरीले २३ जनालाई पक्राउ गरेको छ।

जिरो माइल भन्ने स्थानमा रहेको बीरबहादुर राउतको घरको दोस्रो तलामा गैरकानुनी रुपमा कल सेन्टर चलाएर शंकास्पद गतिविधि गरिरहेको पाइएपछि २३ जनालाई पक्राउ गरिएको जिल्ला प्रहरी प्रमुख प्रहरी उपरीक्षक विश्वराज खड्काले जानकारी दिए ।

उनका अनुसार पक्राउ गर्नेमा ९ महिला र १४ जना पुरुष छन् ।

कल सेन्टरमा काम गर्नेलाई पक्राउ गरिए पनि मुख्य सञ्चालक पत्ता लाग्न नसकेको र खोजी कार्य जारी रहेको एसपी खड्काले मेरोन्यूजलाई जानकारी दिए ।

सोमबार बेलुकी खानतलासी गर्दा कल सेन्टर सञ्चालन गर्न ३० वटा कम्प्युटरमा इन्टरनेट जडान गर्ने काम भइरहेको पाइएपछि पक्राउ गरिएको हो ।

साथै थप ६० वटा कम्प्युटर इन्टरनेट जडान गर्ने तयारीमा राखिएको थियो। ९० थान कम्प्युटर, २ वटा मोटरसाइकल पनि बरामद गरिएको उपरीक्षक खड्काले बताए।