सुनसरी । जिल्लाको भोक्राहा नरसिंह गाउँपालिका ८ स्थित सीमा इलाकाबाट वैशाख १५ गते सशस्त्र प्रहरीले करिव तीन लाख रुपैयाँ बराबरको कपडा बरामद गरेको छ ।

भारतबाट अवैध रुपले नेपालतर्फ साइकलमा राखी ल्याउँदै गरेको उल्लेखित मूल्य बराबरको लत्ता कपडा बीओपी उल्टीले बरामद गरेको हो ।

सशस्त्र प्रहरीलाई टाढैबाट देख्नासाथै सामान छाडेर साइकल लिई व्यक्ति फरार भएका थिए ।

यसैगरी सुनसरी जिल्लाको देवानगञ्ज गाँउपालिका ६ स्थित राजगञ्ज सिनवारीबाट वैशाख १५ गते सशस्त्र प्रहरीले करिब एक लाख १६ हजार रुपैयाँ बराबरको कपडा बरामद गरेको छ ।

भारतबाट अवैध रुपले मोटरसाईकलमा राखी नेपालतर्फ ल्याउँदै गरेको उक्त लत्ताकपडा प्रस्तावित सीमा सुरक्षा गुल्म कप्तानगञ्ज (बिओपी कप्तानगञ्ज)ले बरामद गरेको हो ।

मोटरसाइकल चालक भने सशस्त्र प्रहरीलाई देख्नासाथै सोही ठाउँमा सामान छाडेर फरार भएका थिए ।

यसैगरी सोही जिल्लाको कोशी गाउँपालिका ८ स्थित पूर्व–पश्चिम लोकमार्गबाट वैशाख १४ गते सशस्त्र प्रहरीले करिव २ लाख रुपैयाँ बराबरको कपडा बरामद गरेको छ ।