काठमाडौं । रुपन्देही जिल्लाको सिद्धार्थनगर नगरपालिका–१ आँपबगैचा ईलाकाबाट सशस्त्र प्रहरीले २२ लाख ३० हजार ५ सय ९० रुपैयाँ बराबरको चोरीपैठारीको इलेक्ट्रिक सिगरेट, इलेक्ट्रिक आईटम्स्, मोटरपार्ट्स र लत्ताकपडा बरामद गरेको छ ।

बुधबार राति साढे १ बजे भारतबाट अवैध रुपले ल्याउँदै गरेको अवस्थामा ती सामानहरु बरामद गरेको शसस्त्र प्रहरीले जनाएको छ । प्रस्तावित सीमा सुरक्षा गुल्म डण्डा (बीओपी डण्डा) बाट खटिएका सशस्त्र प्रहरी नायव उपरीक्षक अरुण शर्माको कमाण्डको टोलीले उक्त सामाग्री बरामद गरेको हो ।

सामान ल्याउने व्यक्तिहरु गस्तीमा रहेको सशस्त्र प्रहरीलाई देख्नासाथै उक्त सामानहरु छाडेर भागेका थिए । बरामद सामान भैरहवा भन्सार कार्यालय बेलहिया रुपन्देहीमा बुझाइएको सशस्त्र प्रहरी नायव उपरीक्षक तथा सह प्रवक्ता शैलेन्द्र थापाले जानकारी दिए ।