काठमाडौँ । इण्डियन प्रिमियर लिग (आईपीएल)फाइनलमा आज चेन्नई सुपर किंग्स र गुजरात टाइटन्सबीच भिडन्त हुदैँछ ।

अहमदावादको नरेन्द्र मोदी स्टेडियममा नेपाली समय अनुसार साँझ ७ः४५ बजेदेखि खेल सुरु हुनेछ ।

चेन्नईले पहिलो क्वालिफायरमा गुजरातलाई पराजित गर्दै फाइनलमा पुगेको थियो । पहिलो क्वालिफायरमा पराजित भएको गुजरातले दोस्रो क्वालिफायरमा मुम्बई इण्डियन्सलाई हराउदै फाइनलको यात्रा तय गरेको हो ।

चेन्नई र गुजरात अहिलेसम्म आईपीएलमा चार पटक आमने सामने भएका छन् । जसमा गुजरातले ३ पटक जितेको छ भने चेन्नईले एक पटक जितेको छ । चेन्नईले यसै सिजनको पहिलो क्वालिफायरमा गुजरातलाई पराजित गरेको थियो । यस अघि २०२२ को सिजनको लिग चरणमा दुई र यस आइपिएलको लिग चरणमा एक पटक गुजरातले चेन्नईलाई पराजित गरेको थियो ।

भारतका अहिलेसम्मकै सफल कप्तान महेन्द्र सिंह धोनीको नेतृत्वमा चेन्नई यस सिजनमा शानदार लयमा देखिएको छ । लिग चरणमा दोस्रो स्थानमा रहेको चेन्नई धोनीको कुटिल कप्तानी र युवा खेलाडीहरुको उत्कृष्ट प्रदर्शनको मिश्रणले फाइनलसम्म पुगेको छ ।

चेन्नईलाई रुतुराज गायकवाड र डेभोन कोनवेले यस सिजनमा ओपनरको रुपमा शानदार शुरुवात दिएका छन् । कोनवेले यस सिजनमा सर्बाधिक ६२५ रन बनाएका छन् भने गायकवाडले ५६४ रन बनाएका छन् । मिडल अर्डरमा आजिख्य रहाने, शिभम दुवे, रविन्द्र जडेजा छन् ।

श्रीलंकाका युवा बलर महिष थीकशाना, तुषार देशपाण्डे र दिपक चहरले उत्कृष्ट बलिङ गरिरहेका छन् । तुषारले यस सिजनमा चेन्नईका लागि १५ खेलमा २१ विकेट लिएका छन् । रविन्द्र जडेजाले १९ र मथीषाले १७ विकेट लिएका छन् ।

हार्दिक पाण्डेयको नेतृत्वमा रहेको गुजरातमा शुभमन गिलले यस सिजनमा तीन शतक प्रहार गरेर उत्कृष्ट फर्ममा रहेका छन् । गीलले आईपीएलमा अहिलेसम्म सर्बाधिक ८५१ रन बनाएका छन् ।

गुजरातको मिडल अर्डरमा हार्दिक पाण्डेय डेविड मिलर, राहुल तेबातिया, राशिद खान छन् ।

गुजरातको बलिङमा मोहमद शामी, मोहित शर्मा, राशिद खान छन् । यस आइपिएल सबाधिक विकेट लिने खेलाडीको शिर्ष तीनमा शामी, राशिद र शर्मा रहेका छन् । शामीले २८, खानले २७ र शर्माले २४ विकेट लिएका छन् ।

आइपिएलको इतिहासमा चेन्नई १०औं पटक आइपिएलको फाइनलमा पुग्दा चार पटक उपाधि जितिसकेको छ ।

दोस्रो सिजन खेलिरहेको गुजरातले दुवै पटक फाइनलको यात्रा तय गरेको छ । गत सिजनमा गुजरातले आफ्नो पहिलो सिजनमा नै उपाधि जितेको थियो ।

आईपीएलमा आइपिएलको इतिहासमा मुम्बई इण्डियन्सले ५, चेन्नईले ४, कोलकोताले २ पटक उपाधि जितेका छन् ।

त्यस्तै राजस्थान रोयल्स, सनराइजर्स हैदरावाद, डेकन चार्जर्स र गुजरात टाइटन्सले एक एक पटक उपाधि जितेका छन् ।

रोयल च्यालेन्जर्स बैंगलोर, पञ्जाब किंग्स, दिल्ली क्यापिटल्स र लखनउ सुपर किंग्सले अहिलेसम्म उपाधि जितेका छैनन् ।