काठमाडौँ । विशेष अदालतले कर फर्छ्यौट आयोगको भ्रष्टचार मुद्दामा तत्कालीन सहसचिव चुडामणि शर्मासहित तीनलाई दोषी ठहर गरेको छ ।

विशेष अदालतका अध्यक्ष श्रीकान्त पौडेल, सदस्यहरू यमुना भट्टराई र शालिग्राम कोइरालाको इजलासले आयोगका तत्कालिन सदस्य सचिव शर्मा, अध्यक्ष लुम्बध्वज महत र सदस्य उमेश ढकालविरुद्ध दोषी ठहर गरेको हो ।

सरकारले गठन गरेको कर फर्छ्यौट आयोगमार्फत व्यापारीलाई कर छुट दिएर भ्रष्टाचार गरेको अभियोगमा उनीहरूविरुद्ध अख्तियारले मुद्दा दायर गरेको थियो । उनीहरूको सजाय निर्धारण गर्न बाँकी रहेको छ ।

आन्तरिक राजस्व विभागका तत्कालीन महानिर्देशक शर्मा आयोगमा सदस्य सचिवको हैसियतमा कार्यरत थिए ।

सोही समयमा कर फर्छ्योट आयोगले बक्यौता (नउठेको कर)का रूपमा रहेको ३० अर्ब ५२ करोड रुपैयाँबाट ९ अर्ब ५४ करोड रुपैयाँ मात्रै असुल गर्ने निर्णय भएको थियो । आयोगले करिब २१ अर्ब रुपैयाँ ‘अनियमितता’ गरेको महालेखाको निष्कर्ष थियो ।