हेटौंडा । जिल्ला प्रहरी कार्यालय मकवानपुरले करिब साढे ५४ लाख रुपैयाँको अवैध सुनसहित एक युवकलाई पक्राउ गरेको छ।

बुधबार बिहान करिब ३ बजे प्रहरी टोलीले ५४ लाख ४८ हजार रुपैयाँ बराबरको अवैध सुनसहित वीरगञ्जका २२ वर्षीय किसन साहलाई नियन्त्रणमा लिएको हो ।

हेटौंडा–१५ स्थित रातोमाटे चेकपोष्टमा यात्रुबाहक बसमा चेकजाँच गर्ने क्रममा ५६१.३० ग्राम सुनसहित उनलाई पक्राउ गरिएको जिल्ला प्रहरी कार्यालय मकवानपुरले जनाएको छ ।

प्रहरीका अनुसार साहले जुत्ताको नोकभित्र उक्त सुन लुकाएर ल्याइरहेका थिए।

साहलाई नियन्त्रणमा लिएर थप अनुसन्धान प्रक्रिया अगाडि बढाएको प्रहरीले जनाएको छ ।