काठमाडौँ । पूर्वराज्यमन्त्री सञ्जय साह ‘टक्ला’ पनि ललिता निवासको जग्गा हिनामिना काण्डमा मुछिएका छन् । प्रहरीको केन्द्रीय अनुसन्धान ब्युरो (सिआइबी)ले टक्ला भौतिक योजना तथा निर्माण राज्यमन्त्री हुँदा जग्गा हिनामिनासम्बन्धी फाइलमा हस्ताक्षर गरेको फेला परेपछि छानबिन थालेको हो ।

०६६ मा बालुवाटारस्थित विशिष्ट व्यक्तिको परिसर विस्तारका नाममा विभिन्न निर्णय भएका थिए । त्यससम्बन्धी फाइल टक्लाले पनि सदर गरी निर्णयका लागि अघि बढाएको पाइएको सिआइबीले जानकारी दिएको छ ।

टक्लाले फाइलमा कुनै राय भने नदिएका आधारमा यसअघि अख्तियार दुरुपयोग अनुसन्धान आयोगले उनीविरुद्ध मुद्दा नचलाउने निर्णय गरेको थियो । विभागीय मन्त्री विजयकुमार गच्छदारविरुद्ध भने आयोगले मुद्दा चलाएको थियो । मुख्य निर्णयमा सञ्जयको संलग्नता नदेखिएको र पछि सहायक प्रस्ताव मन्त्रिपरिषद्मा लैजाँदा भने उनले पनि राय लेखेका थिए ।

जस आधारमा उनी पनि यस प्रकरणमा छानबिनमा रहेको सिआइबीका यस प्रकरणको अनुसन्धान गरिरहेका एक अधिकृतले जानकारी दिए । त्यही आधारमा पूर्वगृहसचिव नारायणगोपाल मलेगो पनि छानबिनमा छन् । मलेगो त्यतिवेला भौतिक मन्त्रालयका सहसचिव थिए ।

टक्ला जनकपुरधामको सञ्चार उद्यमी अरुण सिंघानिया हत्या काण्ड र पाँच जनाको मृत्यु हुनेगरी गराइएको जनकपुर रामानन्द चोक बम काण्डमा संलग्न रहेको देखिएपछि अहिले जेलमा जन्मकैदको सजाय भोगिरहेका छन् । जनकपुर उच्च अदालतले टक्लालाई ५ असोज २०७९ मा जन्मकैदको फैसला सुनाएको थियो ।

रामानन्द चोकमा २०६९ साल बैशाख १८ गते भएको शक्तिशाही बम विष्फोट काण्डमा हत्या तथा हत्या प्रयासमा टक्काविरुद्ध जिल्ला अदालतले सुनाएको फैसला उच्च अदालतले सदर गरेको हो ।