काठमाडौं । जुम्लाकाे सिंजा गाउँपालिका वडा नं-२ रनुखानास्थित रोपनी आधारभूत विद्यालयको पुनर्निर्माणको माग गर्दै एक विद्यार्थीले शिक्षा विज्ञान तथा प्रविधि मन्त्रालयमा निवेदन बुझाएका छन् ।

बाढी-पहिरोका कारण विद्यालय भवन चुहिनाले विद्यार्थीले भाेग्दै आएकाे समस्या समाधान गर्न माग गर्दै सोहि विद्यालयमा अध्ययन गरेका १७ वर्षिय लक्ष्मण शर्माले बुधबार मन्त्रालय पुगेर निवेदन बुझाएका हुन् । उनले विद्यालयका लागि छुट्याइएकाे बजेटमा हुने गरेकाे अनियमितता र भ्रष्टाचार रोक्न पनि माग गरेका छन् ।

शिक्षामन्त्री अशाेक राईलाई भेटेर उनले उक्त निवेदन बुझाएका थिए ।

शर्माका अनुसार मन्त्री राईले निवेदन बुझा्दै आफुले विद्यालयकाे सुधार गर्न र यहाँकाे अनियमितता राेक्न आवश्यक पहल गर्ने प्रतिबद्भता जनाएका थिए । उनले केन्द्र सरकारबाट सामुदायिक विद्यालयका लागि आवश्यक बजेट जाने गरेकाे बताउँदै यदि बजेट हिनामिना भएकाे भए पनि छानविन हुने बताएका थिए ।

वर्षायाममा विद्यालय भवन चुहिँने, पहिराे जाने लगायतका समस्या हुनाले पठनपाठन अवरुद्ध हुने गरेकाे शर्माले बताए । आफुहरुले पटक-पटक ध्यानाकर्षण गराउँदा पनि स्थानीय जनप्रतिनिधिले बेवास्ता गर्दै आएकाे उनकाे भनाइ छ ।

उनका अनुसार जनप्रतिनिधिहरु विद्यालय अनुगमनमा जाने तर समस्या समाधानमा आलटाल गर्दै आएका थिए । साेही कारण आफु शिक्षा मन्त्रालय नै पुगेर ध्यानाकर्षण गराउनु परेकाे शर्माले बताए ।