काठमाडौं । करिब एक क्विन्टल सुन तस्करी प्रकरणको अनुसन्धान प्रहरी उपरीक्षक (एसपी) सञ्जय सिंह थापाको नेतृत्वमा हुने भएको छ। केन्द्रीय अनुसन्धान ब्यूरो (सीआईबी) का एसपी थापा नेतृत्वको अनुसन्धान टोलीले तस्करी प्रकरणको अनुसन्धान गर्ने नेपाल प्रहरीका प्रवक्ता कुवेर कडायतले जानकारी दिए।

एसपी थापाको नेतृत्वको टोलीले आवश्यकता अनुसार प्रहरीहरुको सहयोग लिनेछ। प्रधानमन्त्री पुष्पकमल दाहालको निर्देशनपछि राजश्व अनुसन्धान विभागले सीआईबीलाई आइतबार थप अनुसन्धानका लागि फाइल बुझाएको थियो।

यो प्रकरणमा पक्राउ परेका १७ जनालाई पनि राजश्वबाट सीआईबीको हिरासतमा लगिएको छ। अब सीआईबीले उनीहरुमाथि थप अनुसन्धान गर्नेछ।