पोखरा । भित्री वस्त्र (ब्रा) भित्र लुकाएर २८० ग्राम २९ मिलिग्रामको सुनको बिस्कुट र औंठीसहित प्रहरीले कास्कीको पोखराबाट एक महिलालाई बरामद गरेको छ। यो भनेको २४ तोला सुन हो ।

बैदाम प्रहरी प्रमुख डीएसपी वेदप्रकश जोशीका अनुसार काठमाडौंबाट पोखरा आएको ग १ ख ९९४४ नम्बरको बसमा यात्रारत काठमाडौं जोरपाटी बस्ने ४५ वर्षीया कल्पना गुरुङबाट सो परिणामको सुन बरामद भएको हो ।

विशेष सूचनाका आधारमा पोखरा बसपार्क पुगेर बसबाट झर्नासाथ ती महिलाको शरीर खानतलासी गर्दा ‘सुनजस्तो देखिने’ धातु भेटिएको उनले बताए ।

डीएपी जोशीका अनुसार महिलाले प्रारम्भिक बयानका क्रममा काठमाडौंको एक व्यक्तिले निश्चित रकम दिएर सुन पोखरा लैजान भनेको र सोहीअनुसार आफू सुन बोकेर पोखरा आएको बताएकी छन्।

‘पोखरा पुगेपछि एउटा फोन आउँछ, उसैलाई सुन दिनू भनेका थिए,’ती महिलालाई उधृत गर्दै डीएसपी जोशीले भने, ‘हामीले फोन कुर्‍यौं तर ती महिलाको मोबाइलमा फोनचाहिँ आएको छैन। अब हामी यो धातु राजश्व अनुसन्धान विभागलाई सुम्पन्छौँ।’

महिलाबाट बरामद सुन पोखराको कुनै सुनचाँदी व्यवसायीका लागि कसैले पठाएको र यो उपक्रम लामो समयदेखि चलिरहेको हुनसक्ने प्रहरी स्रोतको भनाइ छ।