काठमाडौं । संखुवासभाको कारागारभित्र दुई कैदीबन्दीको मृत्यु भएको घटनामा प्रहरी सहायक निरीक्षक (असई) लक्ष्मी चौधरी पक्राउ परेका छन्।

आइतबार जिल्ला प्रहरी कार्यलायले असई चौधरीलाई पक्राउ गरेको हो । चौधरीलाई जिल्ला अदालत संखुवासभाबाट पाँच दिन हिरासतमा राख्ने अनुमति लिएको प्रहरी निरीक्षक सरोज खनालले जानकारी दिए।

शनिबार जिल्ला प्रहरी कार्यालय संखुवासभामा कारागार प्रमुख जेलर) राजेन्द्र घिमिरे र असई लक्ष्मी चौधरीविरूद्ध जाहेरी परेपछि अदालतबाट पक्राउ पूर्जी लिइ आइतबार चौधरीलाई पक्राउ गरेर म्याद थपिएको खनालले जानकारी दिए ।

प्रहरीले जेलर घिमिरेविरूद्ध पनि अदालतबाट पक्राउ अनुमति लिए पनि पक्राउ नगरिएको जनाएको छ । यस घटनामा अन्य व्यक्तिहरूको पनि संलग्नताबारे अनुसन्धान गरिरहेको प्रहरीले जनाएको छ।

गत बुधबार बिहान खाँदबारी नगरपालिका–१ मा रहेको कारागार कार्यालय संखुवासभामा रहेका मादी नगरपालिका–५ फेलेदै बस्ने २० वर्षीय विनोद तोलाङ्गी र नुवाकोट ककनी गाउँपालिका–७ का २७ वर्षीय आकाश बलामीको अचेत अवस्थामा फेला परेर उपचारको लागि जिल्ला अस्पताल खाँदवारी लगेपछि उपचारको क्रममा मृत्यु भएको थियो।

त्यस राति ड्युटीमा खटिएका असई लक्ष्मी चौधरी र कारागार प्रमुख घिमिरेको पनि संलग्नता भएको भन्दै पीडित परिवारले किटानी जाहेरी दिएका हुन्।