काठमाडौँ । नेपाली कांग्रेसका नेता डा. शेखर कोइरालाले नक्कली भुटानी शरणार्थी प्रकरणमा केन्द्रीय कारागारमा पुर्पक्षका लागि थुनामा रहेका पूर्वगृहमन्त्री एवं नेपाली कांग्रेसका नेता बालकृष्ण खाणलाई भेटेका छन् ।

केन्द्रीय कारागार कार्यालय स्रोतका अनुसार डा. कोइराला दिउँसो तीन बजे खाणलाई भेटन कारागार पुगेका थिए ।

उनीहरूबीच करिब एक घण्टा कुराकानी भएको कारागार स्रोतले बतायो ।

जिल्ला अदालत काठमाडौँले पुर्पक्षका लागि थुनामा पठाउन गरेको आदेशविरुद्ध उच्च अदालत पाटनमा अपिल गरेका खाणलाई थुनछेक बहसका लागि पेसी चढ्ने बेला भएको समयमा डा. कोइरालाले भेट्नुलाई अर्थपूर्ण रूपमा हेरिएको छ ।

उच्च अदालत पाटनमा थुनछेकको बहस बिहीबार मात्रै हन्छ । स्रोतका अनुसार जिल्ला अदालतको आदेशविरुद्ध उच्चमा गएका यो मुद्दाका प्रतिवादीहरूको मुद्दा भोलि (बिहीबार) पेसी चढ्ने सम्भावना छ । त्यसको पूर्वसन्ध्यामा डा. कोइरालाले खाणलाई भेटका हुन् ।

२७ बैशाखमा चावहिल मैजुवहालस्थित निवासबाट पक्राउ परेका खाणलाई एक असारमा जिल्ला अदालतले पुर्पक्षका लागि थुनामा पठाउन आदेश दिएको थियो ।