काठमाडौँ । प्रधानमन्त्री पुष्पकमल दाहालले कोशी प्रदेशको नामाकरणलाई लिएर जातिय दंगा भड्काउने प्रयास भइरहेको बताएका छन् ।

सोमबार बिराटनगरमा आयोजित समाजवादी मोर्चाको सन्देश सभामा प्रधानमन्त्री दाहालले प्रतिक्रियावादी, धार्मिक अतिवादी र गणतन्त्रविरुद्ध लाग्नेहरुले प्रदेश नामाकरणलाई मुठभेटमा बदल्न खोजेको बताए । उनले भने, ‘कन्फ्रन्टेसन होइन, वार्ता र संवादबाट जनताको भावनाको कदर हुने गरी समाधान खोजिनुपर्छ ।’

सहमतिबाटै प्रदेशको नामाकरण विवादको अन्त्य गरिनुपर्ने प्रधानमन्त्रीको भनाइ छ । सबै दल मिलेर वार्ता गरी नामाकरण विवाद टुंग्याउनुपर्ने उनको भनाइ थियो ।

दाहालले धमाधम भ्रष्टचारका फाइल खोल्न थालेपछि सरकारविरुद्ध विभिन्न खेल र षडयन्त्र सुरु भएको बताए। सरकारले नक्कली शरणार्थी, बालुवाटारको ललिता निवास र सुन तस्करी काण्डका फाइल खोलेर भ्रष्टचारविरुद्ध ठूलो योजनासहित काम गरिरहेको बताए।

‘म सरकारमा जति दिन टिके पनि भ्रष्टचारविरुद्ध काम गरिरहन्छु’, दाहालले भने ।