काठमाडौं । अमेरिकामा बसेर मानव बेचबिखन गरेको आरोपमा पक्राउ परेका मृदुल भन्ने हस्त गौतमविरूद्ध सरकारी वकिलको कार्यालय काठमाडौंले बिहीबार काठमाडौं जिल्ला अदालतमा मुद्दा दर्ता गरेको छ।

सहायक न्यायाधिवक्ता चन्द्र संजेलले गौतमविरूद्ध चार वटा कसुरमा मुद्दा दर्ता भएको जानकारी दिए । मानव बेचबिखन ओसारपसार कसुर, संगठित अपराध, ठगी र एकीकृत कसुरमा मुद्दा दायर भएको सञ्जेलले बताए ।

‘चार वटा छुट्टाछुट्टै फाइलहरू छन्। प्रतिवादीहरू पनि फाइलअनुसार फरक छन्,’ उनले भने।

पहिलो फाइलमा ६ जना, दोस्रोमा ४ जना, तेस्रोमा ५ जना र चौथो फाइलमा ३ जनालाई प्रतिवादी बनाएर मुद्दा लगिएको सञ्जेलले बताए । जसमध्ये गौतमलाई तीन वटा फाइलमा मुख्य प्रतिवादी बनाइएको छ।

यस प्रकरणमा कमल तामाङलाई पनि प्रहरीले पक्राउ गरेको छ । चार वटै फाइलमा तामाङ पनि प्रतिवादी छन् । यस प्रकरणमा प्रहरीले ज्योति कुँवर, पूर्ण लामा र भरतकुमार काफ्लेलाई पनि प्रतिवादी बनाएको छ । लामा र काफ्ले फरार छन् ।

रूकुम घर भई अमेरिकाको टेक्सास बस्दै आएका गौतममाथि मानव बेचबिखन अनुसन्धान ब्युरोले अनुसन्धान गरेको थियो। उनी गत भदौ २० गते पक्राउ परेका थिए। उनीविरूद्ध ब्युरोमा ३५ जनाले जाहेरी दिएका छन्। ३० जना पीडित काठमाडौं र पाँच जना दाङमा छन्।

गौतमसहितको समूहले दुई सय जना बढी नेपाली नागरिकसँग पैसा लिएर अमेरिका पठाइसकेको बयानमा बताएका थिए।