काठमाडौं। १९ औँ एसियाली खेलकुदअन्तर्गत पुरुष क्रिकेटको क्वाटरफाइनल खेलमा नेपाल भारतसँग २३ रनले पराजित भएको छ ।

भारतबाट दुई सय तीन रनको लक्ष्य पाएको नेपालले ९ विकेटको क्षतिमा १ सय ७९ रन मात्र बनाउन सक्यो ।

नेपालका लागि दीपेन्द्रसिंह ऐरीले सर्वाधिक ३२ रन बनाए। कुशल मल्ल र सन्दीप जोराले समान २९–२९ रन बनाए।

यस्तै, कुशल भर्तेलले २८, करन केसीले १८ र आसिप शेखले १० रन बनाए। अन्य ब्याटरले दोहोरो अंक जोड्न सकेनन्।

भारतका लागि रवि विश्‌नोइ र अभिस खानले ३–३ विकेट लिए। यस्तै अर्शदीप सिंहले २ र साइ किशोरीले १ विकेट लिए।

टस जितेर पहिले ब्याटिङ गरेको भारतले निर्धारित २० ओभरमा ४ विकेट गुमाएर २०२ रन बनाएको थियो ।

भारतका लागि ओपनिङ ब्याट्सम्यान यशस्वी जैसवालले सर्वाधिक १०० रन बनाए। यस्तै, रिंकु सिंहले ३५ र शिवम दुवे २५ रनमा नटआउट रहे। कप्तान ऋतुराज गायकवाडले २५ रन बनाए।

यो जितसँगै भारत सेमिफाइनलमा पुगेको छ भने नेपालको एशियन गेम्सको क्रिकेटमा यात्रा समाप्त भएको छ ।