काठमाडौँ । चिनियाँ कम्युनिस्ट पार्टीको तिब्बत स्वायत्त क्षेत्रका सचिव वाङ छुङछेङ आज नेपाल आउँदै छन् ।

नेपालको पाँचदिने औपचारिक भ्रमणका लागि उनी आज बुधबार यहाँ आउन लागेका हुन् ।

नेपाल बसाइको क्रममा वाङले बुधबारदेखि नै उच्चस्तरीय भेटवार्ता गर्ने कार्यसूची छ । उनले आज दिउँसो २ बजे उपराष्ट्रपति रामसहाय यादवसँग शिष्टाचार भेट गर्ने कार्यक्रम छ ।

चिनियाँ भ्रमण टोलीसँग प्रधानमन्त्रीको चीन भ्रमणमा तिब्बत क्षेत्रसँग सम्बन्धित विषयमा भएका सहमति कार्यान्वयनबारे छलफल हुने बताइएकाे छ ।

वाङले बिहिबार बिहान प्रधानमन्त्री प्रचण्डसँग भेट गर्नेछन् । नेपाल भ्रमणको क्रममा उनी पोखरा पनि जानेछन् ।