काठमाडौँ । आईसीसी एकदिवसीय विश्वकप क्रिकेटमा श्रीलंकाविरुद्ध न्युजिल्याण्डले ५ विकेटको जित निकालेको छ । समूह चरणको अन्तिम खेलमा ५ विकेटको जित निकालेको न्युजिल्याण्ड शीर्ष चारमा छ । श्रीलंका पुछारबाट दोस्रो स्थानमा छ ।

अन्तिम खेलमा पाकिस्तान र अफगानिस्तानले राम्रो रनरेटमा जित निकालेमा न्युजिल्याण्ड सेमिफाइनलमा पुग्न असफल हुनेछ । समूह चरणको अन्तिम खेलमा पाकिस्तानले इंग्ल्याण्ड र अफगानिस्तानले दक्षिण अफ्रिकासँग खेल्न बाँकी छ । ती खेलको नतिजाका आधारमा सेमिफाइनल पुग्ने चौथो टिमको टुंगो लाग्ने छ ।

बैंगलोरको एम चिन्नास्वामी स्टेडियममा न्युजिल्याण्डले २३.२ ओभरमा ५ विकेट गुमाएर १७२ रनको लक्ष्य पुरा गरेको थियो । ओपनर डेभन कोनवेले ४५, रचिन रविन्द्रले ४२ र डेरिल मिचेलले ४३ रन बनाए ।

न्युजिल्यान्डले टस जितेर पहिले बलिङ गर्ने निर्णय गरेको थियो । पहिलो इनिङमा श्रीलंकाका कुसल परेराले २८ बलमा ५१ रनको अर्धशतकीय पारी खेल्नुबाहेक अन्य ब्याट्सम्यानले उल्लेख्य रन बनाउन सकेनन् ।

न्यूजिल्याण्डका लागि ट्रेन्ट बोल्टले सर्वाधिक ३ विकेट लिए भने रचिन रविन्द्रका अलावा मिचेल सान्टनर र लोकी फर्गुसनले २–२ विकेट लिए । उल्लेखनीय छ कि श्रीलंकाले अन्तिम दुई विकेटको लागि २३.१ ओभर ब्याटिङ गरेर सबैलाई चकित पारेको थियो।