काठमाडौं । तिहार लक्षित गरेर राष्ट्र बैंकको टक्सार विभागले गत आइतबारदेखि ५ दिनसम्म बिक्रिका लागि खुला गरेको सुन–चाँदीका सिक्का ४३ हजार थान बिक्रि गरेको छ ।

पाँच दिनको अवधिमा उक्त परिणाममा सुन र चाँदीका सिक्का बिक्री भएको राष्ट्र बैंकले जनाएको छ ।

काठमाडौंको बबरमहलस्थित राष्ट्र बैंकको टक्सार विभागले धनतेरसलाई लक्षित गरी सुन–चाँदीका सिक्का बिक्री गरेको थियो ।

आइतबारदेखि बिहीबारसम्मको अवधिमा सुन र चाँदीका ४३ हजार थान सिक्का बिक्री भएको टक्सार विभाग प्रमुख थानेश्वर आचार्यले जानकारी दिए ।

राष्ट्र बैंकले सुनका १० ग्राम, ५ ग्राम र २.५ ग्रामका सिक्का (असर्फी) तथा चाँदीका १० ग्राम र २५ ग्रामका सिक्का (मेडालियन) बिक्री गर्दै आएको छ । सुनचाँदीको प्रचलित बजार मूल्यमा निर्माण लागत थप गरी राष्ट्र बैंकले सिक्का बिक्री गर्दै आएको छ ।