म्याग्दी । स्थलमार्गबाट मुुस्ताङ जिल्ला भित्रने प्रवेश बिन्दुमा पर्ने थासाङ गाउँपालिका–२ मा रहेको सेकुङ र भुतर्छो ताल पर्यटकको पर्खाइमा छन् ।

समुन्द्रि सतहदेखि दुई हजार ६८३ मिटरको उचाईमा सल्ला र धुपीका रुखहरु रहेको जंगलको विचमा अवस्थित भुर्छतो तालको लम्बाई करिब पाँच सय मिटर, चौडाई पचास मिटर र गहिराई पाँच मिटर भएको अनुमान छ ।

करिब १५० मिटर लम्बाई र विस मिटर चौडाई रहेको सेकोङ ताल समुन्द्रि सतहदेखि दुई हजार ७२५ मिटरको उचाईमा अवस्थित छ । ताल परिसरमा चौरि, भेडाबाख्रा र गाईभैसीको चरन खर्क छ ।

करिब तीस मिनेटको अवधिमा सेकुङ र भुतर्छो तालको यात्रा गर्न सकिन्छ । दुई वटै तालको पृष्ठभुमिमा पुर्वतर्फ निलगिरि र पश्चिममा धौलागिरि हिमालको मनमोहक दृष्य अवलोकन गर्न सकिन्छ ।

बेनी–जोमसोम सडकको ताङछर देखि सेकुङ हुँदै भुतर्छो ताल जोड्ने साढे तिन किलोमिटर सडक निर्माण भएको छ । पर्यटन विभाग र थासाङ गाउँपालिकाको लागत साझेदारीमा तालको वरपर पैदलमार्ग, सार्वजनिक शौचालय लगायतका पूर्वाधार निर्माण भएको छ । सडक, सुरक्षित पदमार्ग र ताल संरक्षण भएपछि पर्यटक आगमन बढ्ने अपेक्षा गरिएको छ ।

सेकुङ र भुतर्छो ताल धवलागिरि आईसफल जाने पदमार्गको प्रवेश विन्दुमा पर्छ । ताल परिसरको चरन खर्कमा शरद र वसन्त ऋतुमा गाईभैसी, भेडाबाख्रा र चौरी गोठ रहन्छन् । चलचित्र र गितका म्युजिक भिडीयो छायांकनका लागि यो ताल “भर्जीन” स्थल बन्न सक्ने सम्भावना रहेको छ ।