काठमाडौं । नेकपा एमालेले हालै सम्पन्न भएको स्थानीय तहको उपनिर्वाचनको समिक्षा गरेर पहिले भन्दा राम्रो उपलब्धि हासिल गरेको निष्कर्ष निकालेको छ । 

मंगलबार बसेको एमाले सचिवालय बैठकमा हालै सम्पन्न उपनिर्वाचनबारे समीक्षा गर्दै एमालेले यस्तो निष्कर्ष निकालेको हो । 

एमालेले उपनिर्वाचन भएका ४२ मध्ये आफ्नो पार्टीबाट जितेका ७ वडा सबै फिर्ता नगरेपनि अध्यक्ष र उपाध्यक्षसहित ८ पदमा जित निकालेकोमा उपलब्धिका रूपमा लिएको बैठकपछि उपमहासचिव प्रदीप ज्ञवालीले जानकारी दिए ।

उनले कीर्तिपुर र काठमाडौैं महानगर १६ मा भएको हारलाई सहरी जनमतसँग पार्टीलाई जोड्नुपर्ने निष्कर्ष निकालेको बताए । 

एमालेले आफ्नो मात्र नभएर सबैको हकमा जनमत चेन्ज भएको देखिएको र त्यसलाई गम्भीर रूपले लिँदै जनप्रतिनिधिहरूले जनताको मत जित्न सक्नुपर्ने ठहर गरेको छ ।

त्यसैगरी एमालेले मंसिर १७ देखि २० सम्म भएको एमाले अध्यक्ष तथा प्रधानमन्त्री केपी शर्मा ओलीको चीन भ्रमण र भ्रमणमा भएको बीआरआई फ्रेमवर्क सहमतिलाई सरकारको सफलता मानेको छ ।