काठमाडौं । पहिलो लायन्स कप पुरुष अन्तर्राष्ट्रिय भलिबल प्रतियोगिता आगामी वैशाख महिनामा आयोजना हुने भएको छ ।

लायन्स इन्टरनेशनल डिष्ट्रिक्ट ३२५ एम नेपालको आयोजनामा आगामी बैशाख १८ देखि २२ गतेसम्म पहिलो लायन्स कप पुरुष अन्तर्राष्ट्रिय भलिबल प्रतियोगिता आयोजना हुने भएको हो ।

आयोजकले सोमबार काठमाडौंमा पत्रकार सम्मेलनको आयोजना गरि प्रतियोगिताबारे जानकारी गराएको हो । पोखरास्थित पोखरा रंगशालाको इन्डोर कभर्डहलमा हुने प्रतियोगितामा दुई विदेशीसहित ६ टोली सहभागि हुनेछन् । हालसम्म पाकिस्तान भलिबल क्लब (इस्लामावाद), नेपाल पुलिस क्लब, गण्डकी प्रदेश भलिबल संघ, त्रिभुवन आर्मी क्लब र नेपाल एपीएफ क्लबले प्रतियोगिता खेल्ने निश्चित भइसकेको आयोजकले जनाएको छ ।

यस्तै भारत र इरानको टिमसँग पनि सरसल्लाह भइरहेको र यी दुई राष्ट्रमध्यको एक टोलीसँग सम्झौता गरि प्रतियोगितामा सहभागि गराइने लायन्स क्लब, नेपालका डिष्ट्रिक्ट गभर्नर चण्डीप्रसाद अर्यालले बताएका छन् । लिगकम नकआउट चरणका आधारमा हुने प्रतियोगितामा सहभागि हुने टोलीलाई प्रत्येक समूहमा ३ टोली पर्नेगरि दुई समूहमा विभाजन गरिनेछ । प्रतियोगितामा सहभागि विभाग बाहेकका टोलीले तीन विदेशी खेलाडी समावेश गर्न पाउनेछन् ।