सुनसरी । जिल्लाको इटहरी उपमहानगरपालिका ६ बाट साथीको हत्या गरेको अभियोगमा एक जना पक्राउ परेका छन् । इलाका प्रहरी कार्यालय इटहरीबाट खटिएको टोलीले बराह नगरापलिका ४ घर भएका २४ वर्षीय प्रकाश तामाङलाई पक्राउ गरेको हो ।

पक्राउ परेका तामाङले वैशाख २२ मा रातको समयमा इटहरी उपमहानगरपालिकाको ट्याङ्ग्रा खोलामा हत्या गरेको प्रहरी अनुसन्धानबाट खुलेको छ । दायाँ हातको नाडीमा ‘दुखी राई’ नाम लेखेका मृतकको यकिन नाम ठेगाना खुलेको छैन । प्रकाशले उनी सडकमा भेटेर ‘साथी’ बनेको तर नाम र ठेगाना थाहा नभएको प्रहरीलाई बताएका छन् ।

करिब ३० वर्षका मृतकको टाउकोमा चोट लागेको छ । विवाद हुँदा टाउकोमा हिर्काएर साथीको हत्या गरेको आरोपीले स्वीकारेको इलाका प्रहरी कार्यालय इटहरीले जनाएको छ ।