काठमाडौं । सरकारले चिनियाँ खोप भेरोसेलको दोस्रो मात्रा जेठ २ देखि शुरु गर्ने भएको छ । स्वास्थ्य सेवा विभाग परिवार कल्याण महाशाखा अन्तरगर्तको खोप शाखाले २ जेठ देखि दोस्रो डोज लगाउने तयारी थाल्न भएको हो ।

भेरोसेल खोप पहिलो (डोज) मात्रा लगाएको चार साता पछि दोस्रो डोज लगाउनुपर्ने हुन्छ । सरकारले २५ चैत देखि भेरोसेल लगाउन थालेको थियो । शुरुमा उपत्यका तीन सहित ७ जिल्लामा १८ देखि ६० बर्षका व्यक्ति र त्यसमा पनि विशेष प्राथमिकता निर्धारण गरि खोप दिएको यियो पछि थप उपत्यकाका सहित अन्य केही जिल्लामा सर्वसाधारणले पनि खोप पाएका थिए ।

खोपशाखा प्रमुख डा झलक गौतमले भेरोसेल खोप लगाएका जिल्लाहरुलाई २ देखि ९ गतेसम्मका लागि खोप अभियान सञ्चालन गरिने जानकारी दिए । अघिल्लो पटक जस्तो अस्पतालमा गएर खोप लगाउने अवस्था नभएकोले विद्यालय, कलेज तथा पार्टी प्यालेस जस्ता खुल्ला ठाँउमा भिडभाड नगरी खोप लगाउने व्यवस्था मिलाउन निर्देशन दिइएको उनले जानकारी दिए ।

चीन सरकारले ८ लाख डोज भेरोसेल खोप अनुदानमा दिएको थियो । सो खोप गत १६ चैतमा नेपाल आइपुगेको थियो ।