काठमाडौं । राष्ट्रपति रामचन्द्र पौडेलले देशको दिगो विकास, समृद्धि र सामाजिक न्यायका लागि राजनीतिक स्थायित्व आवश्यक भएको बताएका छन् ।

आइतबार काठमाडौंमा आदिवासी जनजाति उत्थान राष्ट्रिय प्रतिष्ठानको रजत जयन्ती तथा नेपाल आदिवासी ज्ञान सम्मेलन महोत्सव समारोहको उद्घाटन गर्दै राष्ट्रपति पौडेलले सवैको अधिकार स्थापीतका साथै दिगो विकास, समृद्धि र सामाजिक न्यायका लागि देशमा राजनीतिक स्थायित्व आवश्यक भएको बताएका हुन् ।

राज्यले सबै जाति तथा समुदायलाई विश्वासमा लिएर समावेशी शासन प्रणालीलाई व्यवहारमा उतार्नसके मात्रै राजनीतिक स्थायित्व सम्भव हुने उनले बताए । राष्ट्रपति पौडेलले सबै जाति, भाषा, संस्कृति र समुदायको समान पहुँच, समान अवसर र समान सम्मान अपरिहार्य रहेको र संविधानले निर्दिष्ट गरेको लक्ष्य पनि यही भएको धारणा राखे ।

राष्ट्रपति पौडेलले आदिवासी ज्ञान प्रणालीहरू केवल परम्परामा सीमित नभइ सांस्कृतिक पहिचान, वातावरणीय संरक्षण र दिगो विकासका आधारस्तम्भ पनि भएको बताए ।

उनले सम्मेलनले आदिवासी ज्ञानलाई बौद्धिक र नीतिगत बहसको मूलधारमा स्थापित गर्न महत्वपूर्ण योगदान पु¥याउने आशा व्यक्त गरे ।