काठमाडौं । नेकपा एमालेका नेता सुरेन्द्र पाण्डेले समग्र चुनावी समीक्षा गरेर कार्यशैली परिवर्तन गरेर अघि बढ्नुको विकल्प नभएको बताएका छन्।

चिन्तन अभियान नेपालले शनिबार बुटवलमा गरेको कार्यक्रममा उनले पछिल्ला तीनवटा निर्वाचनको परिणाम हेर्दा एमाले मात्र नभई पुराना राजनीतिक दलहरुको अवस्था दयनीय बनेको र अझै पनि कार्यशैली परिवर्तन नगर्ने हो भने सामूहिक ‘मलामी’ जाने अवस्थामा पुग्ने बताएका हुन्। 

उनले भने, ´एमालेकै कुरा गर्ने हो भने २०७४ सालमा हामीले १७४ सिट जितेर दिग्विजय गर्‍यौं भन्ने थियो तर, जोगाउन सकेनौं। कम्युनिस्टहरू पहिला ३/४ वटा बसमा आउँथे। ०७९ हुँदा एउटा बसमा आउने भयौं, अहिले एउटा माइक्रो बसमा अट्ने भयौं। यस्तै अवस्था हो भने अर्को पटक स्कुटरमा आउँछ ।,’ 

उनले कमजोरीप्रति निर्मम बन्नसक्नुपर्ने बताए।उनले भने, ‘कमजोरीप्रति निर्मम बनेपछि मात्रै हामीले सही बाटो पहिल्याउन सक्छौँ। अन्यथा सामूहिक मलामी जाने दिन आउँछ, हेर्दाहेर्दै’

´हामीले संविधानमै कुनै पनि दलको अध्यक्ष/सभापति वा प्रधानमन्त्री दुइपटक भन्दा बढि हुन नपाउने व्यवस्था गर्न नसक्नु ठूलो कमजोरी भयो,’ पाण्डेले भने।