मकवानपुर । मकवानपुरमा एसईई परीक्षा केन्द्रबाट नक्कली परीक्षार्थी पक्राउ परेका छन्।

मकवानपुरको हेटौँडा उपमहानगरपालिका-१० भुटनदेवीस्थित सोलिड्यारेटी माध्यमिक विद्यालयको एसईई परीक्षा केन्द्रबाट नक्कली परीक्षार्थी पक्राउ गरिएको हो।

शुक्रबार बिहान अर्काको नामको प्रवेशपत्रमा आफ्नो फोटो टाँसी परीक्षा दिन आएका सिन्धुलीको मरिन गाउँपालिका-४ घर भई हाल हेटौंडा-४ स्थित हेटौंडा स्कुल अफ म्यानेजमेन्ट कलेजमा कक्षा ११ मा अध्ययनरत १८ वर्षीय बिराज विकलाई नियन्त्रणमा लिएको प्रहरीले जनाएको छ।

प्रहरीका अनुसार उनले हेटौंडा उपमहानगरपालिका-१२ पदमपोखरीका १९ वर्षीय अंकिश श्रेष्ठको नाममा जारी प्रवेशपत्र प्रयोग गरी परीक्षा दिन आएको खुलेको छ । घटनामा संलग्न रहेको आरोपमा अंकिश श्रेष्ठलाई समेत नियन्त्रणमा लिएको छ।

दुवै जनालाई जिल्ला प्रहरी कार्यालय मकवानपुरमा राखी थप अनुसन्धान भइरहेको छ ।