काठमाडौँ । परीक्षण गर्न नमानेका एक पुरुषको कोरोना भाइरस (कोभिड १९) संक्रमणबाट निधन भएको छ । पाँचथरको फाल्गुनन्द गाउँपालिका ३ चिम्फुलाका ६३ वर्षीय पुरुष आज दिउँसो घरमै निधन भएको हो ।

फाल्गुनन्द गाउँपालिकाका अध्यक्ष वीरबहादुर कुरुम्बाङका अनुसार स्वास्थ्यमा समस्या देखिएपछि उपचारका लागि अस्पताल लैजाने तयारी गर्दै गर्दा उनको घरमै निधन भएको हो । ती व्यक्तिमा मृत्युपछि गरिएको एण्टिजेन परीक्षणमा कोभिड–१९ पुष्टि भएको अध्यक्ष कुरुम्बाङले जानकारी दिए ।

केही दिनअघि नै मृतकको परिवारका सदस्यहरूमा गरिएको परीक्षणमा संक्रमण पुष्टि भएको थियो । मृतकमा समेत कोभिड–१९ सँग मिल्दाजुल्दो लक्षण देखिएको र उनीबाट आफूहरूमा संक्रमण भएको उनका छोरा, बुहारी तथा छोरीले बताएका थिए ।

मृतकको शरीरलाई घर नजिकै धार्मिक मान्यताअनुसार नेपाली सेनाले शव व्यवस्थापन गर्न लागेको गाउँपालिका अध्यक्ष कुरुम्बाङले जानकारी दिए ।