काठमाडौं । चीनले अनुदानमा दिएको खोप लिएर नेपाल एयरलाइन्सको चार्टर विमान आज काठमाडौं आउँदैछ ।

चिनियाँ राष्ट्रपति सी जिनपिङले सहयोग घोषणा गरेको १० लाख डोज खोपमध्ये करिब ८ लाख डोज आज काठमाडौं आइपुग्ने बताइएको छ ।

नेपाल वायु सेवाका महाप्रबन्धक डिमप्रकाश पौडेलले यो चार्टर उडानबाट करिब ८ लाख डोज खोप ल्याउने तयारी गरिएको जानकारी दिए ।

सोमबार राति ११ बजे बेइजिङका लागि उडेको विमान आज दिउँसो साढे २ बजे खोप लिएर फर्किने पौडेलले बताए ।

खोप शाखा प्रमुख झलक शर्मा गौतमले चीनको बेइजिङबाट ८ लाख र तिब्बतबाट १ लाख गरी ९ लाख खोप आज नेपाल आइपुग्ने जानकारी दिए ।

गत बुधबार राष्ट्रपति विद्यादेवी भण्डारी एवं अन्य विभिन्न राजनीतिक दलका प्रतिनिधिसँगको संयुक्त छलफलमा चिनियाँ राष्ट्रपति सीले नेपाललाई १० लाख डोज खोप दिने घोषणा गरेका थिए ।