काठमाडौं । सत्तारुढ दल एमालेभित्रै अन्तरसंर्घष गरिरहेको माधव नेपाल र झलनाथ खनाल समुहले बाध्य भएर आफुहरु वैकल्पिक बाटो अवलम्वन गर्नुपर्ने अवस्थामा पुगेको निश्कर्ष निकालेको छ ।

दुई दिन सम्म आफु पक्षका केन्द्रीय सदस्यहरुसँगको छलफल र त्यसपछि बसेको स्थायी समिति बैठकपछि पारित गरेको समसमायिक प्रस्तावमा नेपाल खनाल पक्षले नेपालको संविधान, पार्टीको विधान र कम्युनिष्ट आन्दोलन एवम् लोकतन्त्रको रक्षाका लागि बाध्य भएर वैकल्पिक बाटो अवलम्बन गर्नुपर्ने अवस्था आएको बताएको छ ।

‘असंवैधानिक किसिमले प्रतिनिधि सभा विघटन गरी आमनिर्वाचनको घोषणा गर्ने कार्यका विरुद्ध देशका प्रमुख राजनीतिक दलहरु कानुनी र राजनीतिक रुपमा संघर्षरत रहेकोस्थितिमा अनिश्चित र परिणामविहीन वार्ता र एकताको नाममा षडयन्त्रपूर्ण जालझेलमा अलमलिनु नहुने स्पष्ट छ,’ नेपाल खनाल पक्षले बैठकबाट पारित गरेको १० बुँदे प्रस्तावमा भनिएको छ,-‘यस्तो स्थितिमा हामीले नेपालको संविधान, पार्टीको विधान र कम्युनिष्ट आन्दोलन एवम् लोकतन्त्रको रक्षाका लागि बाध्य भएर वैकल्पिक बाटो अवलम्बन गर्नुपर्ने हुन्छ ।’

आफुहरु पार्टीको एकता तथा सार्थक र परिणाममुखी वार्ताको पक्षमा रहेको भन्दै यो पक्षले केपी ओलीबाट गत फागुन २८ गते पार्टी विधान विपरीत गरिएको फुटपरस्त निर्णय पछि तीन महिना बित्न थालिसकेका र यस अवधिमा प्रधानमन्त्री समेत रहनु भएका केपी ओलीबाट नेपालको संविधान र पार्टीको विधान विपरीत विभिन्न गतिविधि भएका र पार्टीमा एकता कायम गर्ने दिशामा उन्मुख हुनुको साटो अन्तरविरोध र विभाजन बढाउने कामकुरा मात्रै गरिएको बताएका छन् ।

आफुहरुले अघि सारेका मागमा तत्काल निश्चित समयावधिमा विश्वनीय रुपमा कार्यान्वयन हुनेगरी सहमति सार्वजनिक भएमात्र अध्यक्ष केपी ओली पार्टी एकताको पक्षमा रहनुभएको ठहरिने नेपाल खनाल पक्षको भनाई छ ।

केन्द्रदेखि स्थानीय तहसम्म कथित स्पष्टीकरण, निलम्बन र निष्काशन लगायतका सबै कार्वाईहरु तत्काल खारेज गरिनुपर्ने अन्यथा असंवैधानिक किसिमले प्रतिनिधि सभा विघटन गरी आमनिर्वाचनको घोषणा गर्ने कार्यका विरुद्ध देशका प्रमुख राजनीतिक दलहरु कानुनी र राजनीतिक रुपमा संघर्षरत रहेकोस्थितिमा अनिश्चित र परिणामविहीन वार्ता र एकताको नाममा षडयन्त्रपूर्ण जालझेलमा अलमलिनु नहुने आफनो पक्षको स्पष्ट मान्यता रहेको खनाल नेपाल पक्षले जनाएको छ ।

हेर्नुहोस केन्द्रीय समिति बैठकपछि पारित गरेको प्रस्ताव