काठमाडौँ । कर्मचारी सञ्चय कोषले ब्याजदरको पुनरावलोकन गर्दै नयाँ दर लागु गर्ने भएको छ ।

आगामी आर्थिक वर्षदेखि लागु हुने गरी कोषले सञ्चयकर्ताबाट लिने र कर्जा लगानीमा नयाँ व्याजदर लागु गर्ने भएको हो । ब्याजदर पुनरावलोकनका लागि एक समिति गठन गरी अध्ययन शुरु भएकोले असारको अन्त्यतिर प्रतिवेदन तयार हुने सञ्चय कोषका प्रवक्ता विजय कुमार श्रेष्ठले जानकारी दिए ।

कोरोना महामारीको संक्रमणका कारण देखिएको समस्यालाई ध्यान दिँदै व्याजदरमा स्थिर वा केही कम पनि हुन सक्ने कोषको दाबी छ ।

कोषले सञ्चयकर्तालाई दिने ब्याजमा ७ प्रतिशत र १ प्रतिशत नाफाबाट लाभांश दिएको छ । सञ्चयकर्तालाई साढे ८ प्रतिशत ब्याजमा आवास निर्माणलगायत अन्य कर्जा समेत उपलब्ध गराउने भएकाले यसमा परिमार्जन गर्न थालेको कोषले उल्लेख गरेको छ ।

कोषले विभिन्न बैंक तथा वित्तीय संस्थामा ७५ अर्ब रुपैयाँ बढी मुद्दती निक्षेप राखेको थियो । सञ्चय कोष बैंकहरुको सबैभन्दा ठूलो संस्थागत निक्षेपकर्ता हो ।

चालू आर्थिक वर्षदेखि कोषले निक्षेप–कर्जाको ब्याजदर अनुपात दर १ दशमलब २५ प्रतिशत राखेको छ ।