काठमाडौं । युरोपका विभिन्न ११ शहरमा आयोजना भईरहेको १६औं संस्करणको युरोकप फुटबलमा आज दुई खेलहरु हुँदैछन् ।

युरोकपको समूह चरण अन्तर्गत आज राति समूह डी का इंग्ल्यान्ड र चेक रिपब्लिक तथा क्रोएसिया र स्कटल्याण्ड भिड्ने छन् । इंग्ल्यान्डले वेम्बली स्टेडियममा चेक रिपब्लिकसँग खेल्नेछ । दुई टिमबीचको खेल राति १२ः४५ बजे सुरु हुनेछ ।

आज इंग्ल्यान्ड चेक रिपब्लिकलाई हराउँदै नकआउट चरणमा पुग्ने योजनामा रहेको छ । २ खेलमा ४ अंक जोडेको इंग्ल्यान्ड समूहको दोस्रो स्थानमा छ ।

इंग्ल्यान्डलाई बराबरीको नतिजाले समेत अन्तिम १६ मा पुर्याउने छ । तर, पराजित भएको खण्डमा अन्य टिमको नतिजामा निर्भर रहनुपर्ने छ ।
पहिलो खेलमा क्रोएसियालाई १–० गोल अन्तरले पराजित गरेको इंग्ल्यान्ड दोस्रो खेलमा स्कटल्याण्डसँग गोल रहित बराबरीमा रोकिएको थियो ।

चेक रिपब्लिक पनि इंग्ल्यान्डलाई हराएर अन्तिम १६ मा पुग्न चाहन्छ । चेल रिपब्लिक २ खेलमा ४ अंक जोडेर समूहको शीर्ष स्थानमा रहेको छ । बराबरले समेत चेक रिपब्लिक अर्को चरणको यात्रा तय गर्नेछ ।

पहिलो खेलमा स्कटल्याण्डलाई २–० ले हराएको चेक रिपब्लिक दोस्रो खेलमा क्रोएसियासँग १–१ गोलको बराबरीमा रोकिएको थियो ।
यसै समूहको अर्को खेलमा क्रोएसिया र स्कटल्याण्ड भिड्ने छन् ।

दुई टिमबीचको खेल पनि नेपाली समउ अनुसार राति १२ः४५ बजे सुरु हुनेछ । हाम्पडेन पार्कमा दुबै टिम जित निकाल्दै अन्तिम १६ मा पुग्ने सम्भावना कायम राख्न चाहन्छन् ।

यस समूहमा क्रोएसिया २ खेलमा १ अंक जोडेर तेस्रो स्थानमा छ । पहिलो खेलमा इंग्ल्यान्डसँग १–० ले पराजित क्रोएसिया दोस्रो खेलमा चेक रिपब्लिकसँग १–१ गोलको बराबरीमा रोकिएको थियो ।

स्कटल्याण्ड २ खेलमा १ अंक जोडेर पुछारमा छ । पहिलो खेलमा चेक रिपब्लिकसँग २–० ले पराजित स्कटल्याण्डले दोस्रो खेलमा इंग्ल्यान्डलाई गोलरहित बराबरीमा रोकेको थियो ।

यसअघि गएराती भएको खेलमा बेल्जियमले फिनल्याण्डलाई २–० ले, डेनमार्कले रसियालाई ४–१ ले, अष्ट्रियाले युक्रेनलाई १–० ले र नेदरल्याण्ड्सले मेसेडोनियालाई ३–० ले पराजित गरेका थिए ।