काठमाडौँ । नेपाल विज्ञापन संघ (आन)ले विज्ञापन बोर्डको गठन र गठन प्रक्रियाप्रति आपत्ति जनाएको छ । आनले विज्ञप्ति जारी गर्दै बोर्डको गठन सञ्चार बोर्ड जस्तो भएको भन्दै आपत्ति जनाएको हो ।

बोर्डले विज्ञापन व्यवसायलाई बेवास्ता गर्दै प्रत्यक्ष विज्ञापन प्रक्रियाले मारमा पारेको आनले आरोप लगाएको छ । विज्ञापन बोर्डमार्फत व्यवसायमा कुनै आशा र स्थान नै नरहेको आनको भनाई छ ।

आनले १५ वर्षदेखि राख्दै आएको मागलाई सञ्चार तथा सुचना प्रविधि मन्त्रालयले संसदबाटै २०७६ साल कार्तिक ८ गते ‘विज्ञापन नियमन गर्न बनेको ऐन–२०७६’ मार्फत पूरा गरेकोमा खुसी व्यस्त गरेको थियो ।

यद्यपि, लोक कल्याणकारी विज्ञापनको शब्दमा टेकेर सबै सरकारी विज्ञापनहरूलाई एकद्वार प्रणालीमा ल्याउन ऐनमा नै विवादास्पद दफा खडा गरी पुनः विज्ञापन व्यवसायलाई भागबण्डा, मनोमानी प्रणालीतिर लैजान खोजेको आनले दोष देखाएको छ ।

बोर्डको गठन तथा पुनर्गठनमा व्यवसायका विज्ञ व्यक्तित्वलाई स्थान नदिएर संस्थागत प्रतिनिधित्वलाई मारमा पारेर कार्यकर्ता भर्ती केन्द्र मात्र बनाएको आनको आरोप छ ।

विज्ञापन बोर्ड गठनबाट विज्ञापन व्यवसायको प्रर्बद्धन, विकास, विस्तार र व्यवस्थित हुन्छ भन्नेमा विज्ञापन व्यवसायीहरूमा गम्भिर आशंका उत्पन्न भएको आनले जनाएको छ ।