काठमाडौँ । नेकपा माओवादी केन्द्रले पार्टी छाडेर नेकपा एमालेमा गएको भन्दै कारबाहीमा परेका नेताहरू निर्वाचन आयोगमा जाने भएका छन् । पूर्व माओवादी नेताहरू टोपबहादुर रायमाझी, लेखराज भट्ट, प्रभु साह र गौरीशंकर चौधरीको टोली माओवादीका अध्यक्ष प्रचण्डविरुद्ध उजुरी दिन आयोग जाने भएको हो ।

पूर्व माओवादी टोलीले आज बुधबार आयोगमा आफूहरूमाथि भएको कारबाही फिर्ता गर्न माग गर्दै निवेदन दर्ता गर्न लागेका हुन् ।

‘प्रत्यक्ष निर्वाचित हामीलाई प्रचण्डले गरेको कारबाहीको कुनै वैधानिक छैन,’ पूर्व माओवादीका एक नेताले भने, ‘अवैधानिक रुपमा गरिएको कारबाही फिर्ता गर्न हाम्रो माग छ ।’

माओवादीबाट प्रत्यक्ष निर्वाचित भएका ५ नेताहरू तत्कालीन नेकपा विभाजन भएसँगै नेकपा एमालेमा पक्षमा लागेका थिए । एमालेभित्र चर्को विवाद उत्पन्न हुँदै गर्दा उनीहरू प्रचण्डलाई कारबाही गर्नु माग गर्दै आयोगमा जाने भएका हुन् ।