काठमाडौं । नेकपा एमालेभित्रको विवाद मिलाउन दोस्रो तहका नेताहरुको चर्काे दवावपछि वुधबार साझ नक्सालस्थित मेरियट होटलमा वार्तामा बसेका अध्यक्ष केपी ओली र वरिष्ठ नेता माधव नेपालको वार्ता सकारात्मक हुन सकेन ।

दुई नेताकाबीच पार्टी सञ्चालन र सरकारको जिम्मेवारीका विषयमा केन्द्रीत रहेर कुराकानी भएपनि यी दुवै विषयमा दुवै नेताको अडान र वुझाइ फरक निस्केको नेताहरुको भनाइ छ ।

शुरुमा दुइ दिन यता कार्यदलस्तरमा भएको छलफल र निस्केका सहमतिका वुँदालाई नेताहरुले ओली र नेपाललाई विफ्रिङ गरेका थिए । त्यसपछि भने नमिलेको एक व्यक्ति एक पदको जिम्मेवारी सहित सरकार र पार्टी सञ्चालनका विषयमा केन्द्रीत रहेर ओली र नेपालले एक्लाएक्लै भेटवार्ता गरेका थिए ।

तर यो छलफलमा ओली र नेपालकाबीचमा कुरा नमिलेको स्रोतको भनाई छ ।

नेपालले ओलीसँग सरकार र पार्टी सञ्चालनमा पावर सेयरिङको विषय उठाएका थिए । तर त्यसमा ओलीले कुनै सम्वोधन गर्ने चाहेनन ।

नेपालसँग ओलीले यही सरकारको निरन्तरता र पार्टीमा पनि जेठ २ मा फर्किएको विषय मात्र उल्लेख गरेर जान सकिने धारणा राखेका थिए । तर नेपालले भने सरकार र पार्टीमा अब एक व्यक्ति एक मुख्य जिम्मेवारीको विषय सम्वोधन हुनुपर्ने बताएका थिए ।

नेता नेपालले मुलतः सांगठनिक र राजनीतिक विषयमा पावर सेयरिङको कुरा उठाएका थिए । तर ओलीले त्यसमा कुरै सुन्न नचाहेपछि वार्ता विनानिश्कर्ष टुग्गिएको नेताहरुको भनाइ छ ।

ओलीले पार्टी मिलाउने, संसदका विषयमा अदालतले गर्ने फैसला पछि पनि पार्टी निर्णय अनुसार निशर्त नेपाल समुह हिडनुपर्ने जसरी कुरा राखेको स्रोतको भनाई छ ।

तर नेपालले भने निशर्त ओलीसँगको सम्वाद मिलाउने भन्दा पनि सरकार र पार्टी सञ्चालन लगायतका विषयमा पावर सेयरिङकै तहमा सहमति , सम्झौता खोजेका थिए । तर त्यसमा ओलीले कुरै सुन्न चाहेनन । नेपालले पावर सेयरिङको विषय उठाएपछि भने ओलीले सर्वोच्चमा पुगेर गरेको हस्ताक्षरको विषय फेरि दोहोर्‍याएर उठाएका थिए ।

ओली कमरेड निशर्त माधव नेपाल समुहले आफुलाई सहयोग गर्नुपर्छ भने जसरी मात्र आउनुभयो, त्यसैकारण कुरा मिल्दै मिलेन, नेपाल निकट स्रोतले भन्यो ।

त्यसपछि भने ओली पक्षका नेताहरुले छलफलमा उठेका विषयमा कुनै प्रतिक्रिया नदिई हिडेका थिए ।

ओली र नेपालले पनि छलफलस्थलबाट कुनै प्रतिक्रिया नदिइ हिडेका थिए ।

तर अन्य नेताहरुले भने छलफल सकारात्मक भएको दावी गरेका थिए । कार्यदल स्तरमा भोलि छलफल भएर मिल्ने उनीहरुले दावी गरेपनि बुधबार साझ ओली र नेपालकोबीचको सम्वाद मिठासपूर्ण नरहेको स्रोतको भनाइ छ ।