– एमाले अध्यक्ष तथा प्रधानमन्त्री केपी शर्मा ओली सरकारको नियमित काम र पार्टी आन्तरिक विवाद मिलाउनमै व्यस्त ।
– नेपाली कांग्रेसका सभापति शेरबहादुर देउवा पार्टी महाधिवेशनको चटारोमा । निकट नेताहरुसँग यदाकदा छलफलमा ।
– माओवादी केन्द्रका अध्यक्ष पुष्पकमल दाहाल (प्रचण्ड) घरमै आउने नेता–कार्यकर्तासँगको छलफलमा । एकाध बाहिरी राजनीतिक भेटघाट ।

प्रमुख तीन राजनीतिक पार्टीका शीर्ष नेताका पछिल्ला केही दिन यताका दैनिकी हुन् – यी । शनिबार प्रधानमन्त्री केपी ओली सिन्धुपाल्चोकको बाढी पहिरो प्रभावित क्षेत्रको अवलोकनमा निस्किए । माओवादी केन्द्रका अध्यक्ष प्रचण्डले एमालेकै वरिष्ठ नेता माधव नेपाल र त्यसपछि कांग्रेस सभापति शेरवहादुर देउवासँगको छलफलबाहेक घरमै आएका नेता- कार्यकर्तासगै गफिएर बिताए ।

देउवाको अवस्था पनि त्यस्तै हो । शुक्रबार मात्रै २७ औं वैवाहिक वर्षगाँठ निवासमै मनाएका देउवा पार्टी महाधिवेशनकै केही आन्तरिक तयारीमै थिए । शनिबार उनले पनि आफूलाई भेट्न निवासमै आएका प्रचण्डसँग केही समय छलफल गरे ।

त्यसबाहेक देशको राजनीतिमा प्रभाव जमाउन सक्ने यी शीर्ष नेताहरुका दैनिकीमा नयाँपन केही छैन ।

पहिलो पटक प्रधानमन्त्री केपी ओलीले हठात् प्रतिनिधिसभा विघटन गरिदिँदा पक्ष/विपक्षमा विरोध प्रर्दशन गरेका ओली-प्रचण्ड मात्रै होइन, देउवा समेत आफ्नै काममा व्यस्त हुने गरेका थिए ।

यो पटक दोहोर्याएर संसद विघटन गर्ने काम प्रधानमन्त्रीले राष्ट्रपतिसम्मको साथ लिएर गरेका छन् । पहिलेकै जस्तो दलहरु सर्वाेच्च पुगेका छन् । यसपटक कांग्रेससमेत स्वयम् ओलीको त्यस्तो कदमको विपषमा मोर्चाबन्दी गरेरै आन्दोलनमा छ । तर उनीहरुले यो पटक सडकमा जवस-मोर्चाका एकाध संर्घषका कार्यक्रमबाहेक आन्दोलनको पक्ष/विपक्षमा दौडादौड गर्नुपर्ने बाध्यता नेताहरुलाई छैन । कोरोना महामारीका कारण पनि पहिले जस्तो सडकमै आउने वातावरण बनेको छैन ।

प्रधानमन्त्री ओलीलाई आफैंले दोहोर्याएर गरेको प्रतिनिधिसभा विघटन सदर भए आफूले गरेको काम संविधान सम्मत छ भनी सावित गर्नुछ ।
कांग्रेस सभापति देउवालाई आफूले जुटाएको १४६ सांसदको बहुमत देखाएर फेरि पाँचौ पटक प्रधानमन्त्री बन्नु छ । माओवादी केन्द्रका अध्यक्ष प्रचण्डलाई ओलीले यो बीचमा पेलेको र निचोरेको बदला लिनु छ ।

तर यी तीनै नेताको चाहनामध्ये कसको कुरालाई सहिसावित गर्ने भन्ने विषय सर्वोच्च अदालतका पाँच न्याय मूर्तीको विवेकमा छ ।

प्रधानन्यायाधीश चोलेन्द्रशम्शेर जबरा, न्यायाधीश दीपककुमार कार्की, मीरा खड्का, ईश्वरप्रसाद खतिवडा र डा आनन्दमोहन भट्टराईको इजलासले प्रतिनिधि सभा विघटनसम्बन्धी मुद्दाकाे फैसला गर्दै छ । असार ९ बाट नियमित संवैधानिक इजालसमा वहस गराएर अदालतले २१ गते २८ गत सम्मलाई इजालस रोकेर बसेको छ । हेर्दाहेर्दैमा मुद्दालाई राखेर वसेको सर्वाेच्चले सोमबार नै निर्णय दिन पनि सक्छ, नभए ३१ असार सम्ममा फैसला सुनाउने तयारी गरेको अदालत स्रोतको भनाई छ । निर्णय सुनाउने नभनी हेर्दाहेर्देमा मुद्दालाई राखेको कारण भोलि नै निर्णय आउने, नआउनेमा भने यसै भन्न सकिने अवस्था भने छैन ।

जसकाकारण पनि नेताहरुमा सन्नटा छाएको छ । तर त्यसमध्ये कोही कसैले केही बाेलिहाले र भेटिहाले भने फेरि एकातिर मात्रै होइन, तिन तिरैको (बालुबाटार, बूढानीलकन्ठ र खुमलटार) नेताहरु र उनीहरुका निवास क्षणभरमै तरंगित हुने अवस्था छ ।

राजनीतिक गतिविधि ठप्प, फुर्सदिला नेता
सर्वोच्च अदालतमा बहस सकिएलगतै राजनीतिक गतिविधि शून्यतामा छ । शीर्ष नेताहरु नै अदालतको निर्णय पर्खेर आफ्नै निवासमा फुर्सदिला नेता भएर बसेका छन् ।

दौडधुप बाक्लो छैन । घरमा आउने नेता कार्यकर्तासँग सामान्य भेटघाट गर्ने, केही आन्तरिक भेटघाट गर्ने, पार्टीभित्रको आन्तरिक विवाद मिलाउन प्रयास गर्ने बाहेक प्रमुख नेताहरुकै गतिविधि पनि सुस्ततामा पुगेको छ । सधैँजसो सार्वजनिक कार्यक्रममा देखिने शीर्ष नेताहरु अहिले भने कार्यक्रममा पनि देखिँदैनन् ।

प्रधानमन्त्री तथा एमाले अध्यक्ष ओली बालुवाटारस्थित सरकारी निवासकै आन्तरिक काममा व्यस्त छन् । उनी शनिबार सिन्धुपाल्चोकको बाढी पहिरो प्रभावितहरुको अवस्था र त्यहाको राहतलगायत कार्यक्रमका लागि मेलम्ची पुगेका छन् । प्रचण्ड भने शनिबार माधव नेपालसँग डेढ घण्टा भेटेपछि देउवा निवासमा पुगेका छन् । अरुको भन्दा छटपटी प्रचण्डमै देखिन्छ । उनी यदाकदा नेताहरुसँगको भेटघाटमा दौडिरहेका छन् ।

तर उनी पनि पहिलेको तुलनामा निक्कै फूर्सदिला बनेका छन् । तीन शीर्ष नेताको सचिवालयका अनुसार नेताहरु पहिलाकोभन्दा धेरै फुर्सदिला छन् ।

एमाले अध्यक्ष तथा प्रधानमन्त्री केपी शर्मा ओली पार्टीको काम र नियमित कार्यममा सहभागी हुने गरेका छन् । प्रधानमन्त्रीका प्रेस सल्लाहकार सूर्य थापाका अनुसार ओली नियमित काम, पार्टी एकताको काम, अध्ययन तथा भेटघाटमा हुने गरेका छन् ।

यस्तै कांग्रेस सभापति देउवा पार्टीको महाधिवेशनमा लागेका छन् । देउवाका स्वकिय सचिव भानु देउवाका अनुसार उनी महाधिवेशनको तयारीमा रहेका छन् । उनले भने, ‘सभापति अहिले महाधिवेशनको काममा लाग्नु भएको छ । कार्यकर्तासँग भेटघाट, आफ्नो पक्षमा बलियो माहोल बनाउन लाग्नु भएको छ ।’

माओवादी अध्यक्ष प्रचण्ड अध्यनमा लागेका छन् । उनका प्रेस सल्लाहकार विष्णु सापकोटा (जुगल) का अनुसार पार्टीको कार्यदल बैठक चलिरहेको छ । उनले भने, ‘पार्टीको कार्यदल बसिरहेको छ । अरु अध्ययन गर्ने । खेलकूद खेल्ने गरिरहनु भएको छ ।’

बढ्दो छटपटी

सर्वाेच्चले प्रतिनिधिसभा विघटन र कांग्रेस सभापति शेरबहादुर देउवालाई प्रधानमन्त्री नियुक्तीको परामादेश के गर्ला भन्ने उत्तिकै खुल्दुली छ ।

नेताहरुलाई सर्वोच्चले के फैसला गर्छ भनेर ढुक्ढुकी बढ्न थालेको छ । छटपटी पनि उत्तिकै बढेको छ । फुर्सदिला जस्ता देखिए पनि मन थिरमा देखिदैन । असान्त मन कहिले कता कहिले कता ? कुनै नेताले केही टिप्पणी गरे भने या केही गतिविधि अगाडि बढ्यो भने के गर्ने भनेर निक्कै चनाखो अवस्थामा उनीहरु देखिन्छन् ।

जस्तोकी एमालेभित्र विवाद मिल्ने गरी सहमति नजिक पुग्यो रे भन्ने बित्तिकै प्रचण्ड नेपाल निवास एमाले मिल्न लागेकै हो ? भन्ने प्रश्न सोध्न पुगेका थिए । नेपालसँगको छलफललगत्तै उनी कांगेस सभापति देउवाको निवास पनि पुगे ।

यो तरंगित राजनीतिको एउटा पाटो मात्र हो ।

ओली सर्वोच्चको फैसला आउनुभन्दा अगाडि नै पार्टी मिलाउनु पर्छ भन्नेमा पुगेका छन् । उनले सर्वोच्चको फैसलालाई नै मध्यनजर गरी पार्टीलाई मिलाउन पार्टीका कमिटी २ जेठ २०७५ को अवस्थामा फर्काएका छन् भने नेपाल पक्षलाई सहमतिमा ल्याउन उनी पछिल्लो समयमा लचिलो देखिन खोजेका छन् ।

यस्तै प्रचण्ड पनि सर्वोच्चको फैसलालाई मध्यनजर गर्दै नेपालसँग पटकपटक भेटवार्ता गर्दै आएका छन् । यता देउवा पनि सबैसँग छलफलमा रहेको बुझिएको छ ।