काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई सुरक्षा व्यवस्था थप गरिएको छ । उनीमाथि सुरक्षा ‘थ्रेट’ बढेको भन्दै सुरक्षा व्यवस्था बढाइएको हो ।

यसअघि तत्कालीन प्रधानमन्त्री केपी शर्मा ओली सरकारले प्रचण्डसहित शीर्ष नेता तथा पूर्व राज परिवारको सुरक्षा व्यवस्था घटाएको थियो । नेपाली कांग्रेसका सभापति शेरबहादुर देउवा प्रधानमन्त्री बनेलगत्तै प्रचण्डको सुरक्षा बढाएको हो ।

ओली नेतृत्वको सरकारले प्रचण्डको सुरक्षामा खटिएको डिएसपीलाई हटाएर नेपाल प्रहरीका सईको नेतृत्वमा सुरक्षाकर्मी खटाएको थियो । यससँगै प्रचण्डले आफ्नो सुरक्षालाई ध्यान दिँदै पूर्व लडाकुको टोली थप सुरक्षामा खटाएका थिए ।

देउवा नेतृत्वको सरकारले प्रचण्डलाई पुनः डिएसपीकै नेतृत्वमा सुरक्षाकर्मी खटाइएको छ । डिएसपी प्रचण्डको अंग रक्षकका रुपमा हुनेछ । गृह मन्त्रालयका अनुसार प्रचण्डले आफूलाई डिएसपी कमाण्डको सुरक्षा व्यवस्था गरिदिन आग्रह गरेका थिए ।