काठमाडाैं । नेपाल पक्षकाे एकतालाई थाती राख्दै एमाले अध्यक्ष केपी शर्मा ओलीले ११ विभाग बनाएका छन् । आज बसेकाे स्थायी कमिटी बैठकबाट उनले विभिन्न ११ विभाग गठन गर्ने निर्णय गराएका हुन् ।

संगठन विभागको प्रमुखमा उपमहासचिव विष्णु पौडेल ताेकिएका छन् । संसदीय विभागको प्रमुखमा दलका उपनेता सुवास नेम्वाङ, आर्थिक विभाग प्रमुखमा विष्णु रिमाल, प्रचार विभाग प्रमुखमा प्रदीप ज्ञवाली, पर्यटन प्रवर्द्धन विभाग प्रमुखमा भानुभक्त ढकाल रहेका छन् ।

अध्यक्ष केपी शर्मा ओलीले आफू मातहत स्कूल विभाग राखेका छन् । विदेश विभाग प्रमुखमा डा राजन भट्टराई, निर्वाचन विभाग प्रमुखमा अग्नि खरेल र स्थानीय तह विभाग प्रमुखमा देवेन्द्र दाहाल रहेका छन् ।

एमाले विधानमा झण्डै २ दजर्न बढी विभाग र आयाेग गठन गर्न सक्ने प्रावधान छ । एमालेकै माधव नेपाल पक्ष एकतामा आउन सक्ने अवस्थालाई मध्यनजर गर्दै केही विभागलाई पूर्णता नदिइएकाे प्रवक्ता प्रदीपकुमार ज्ञवालीले जानकारी दिए ।

‘हामीले केही विभागहरु गठन गरेका छौँ । जसलाई २५ सदस्यीय बनाउन मिल्छ। हामीले सुरुमा थोरै सदस्य राखेर नौवटा विभाग गठन गरेका छौँ’, उनले भने, ‘माधव पक्षका नेताहरू आउनुहुन्छ भनेर हामी कुरिरहेका छौँ। त्यही भएर ठाउँ राखेका हौँ।’